پاکستان شوبز انڈسٹری کے سینئر اداکار مصطفی قریشی نے کہا ہے کہ موجودہ حالات دیکھ کر ایسا لگتا ہے کہ “پنکی” کہیں الیکشن جیت کر ایم این اے، وزیر یا مشیر ہی نہ بن جائے کیونکہ پاکستان کی سیاست کے بارے میں کچھ بھی کہا جا سکتا ہے۔
کراچی میں میڈیا سے گفتگو کرتے ہوئے مصطفیٰ قریشی نے کہا کہ میڈیا نے پنکی کو غیر معمولی کوریج دے کر “انمول” بنا دیا ہے۔ انہوں نے طنزیہ انداز میں کہا کہ جتنی توجہ پنکی کو دی جا رہی ہے، شاید اتنی کوریج تو وزیراعظم کو بھی حاصل نہیں۔
سینئر اداکار نے سوال اٹھایا کہ آخر پنکی کس کے کہنے پر اتنے جرائم کر رہی تھی اور اتنے عرصے تک قانون کی گرفت سے باہر کیسے رہی۔ ان کا کہنا تھا کہ اس صورتحال پر کئی سوالات جنم لیتے ہیں جن کے جواب سامنے آنا ضروری ہیں۔
مصطفیٰ قریشی نے بھارتی سیاست کی مثال دیتے ہوئے کہا کہ بھارت میں Phoolan Devi بھی ایک وقت میں ڈاکو کے طور پر مشہور تھیں، مگر بعد میں انہوں نے الیکشن لڑا اور بھاری اکثریت سے کامیابی حاصل کی۔ انہوں نے خدشہ ظاہر کیا کہ پاکستان میں بھی حالات کچھ ایسے ہی رخ اختیار نہ کرلیں۔
