پنجاب حکومت نے صوبے کے تعلیمی نصاب میں “معرکۂ حق” کو شامل کرنے کا فیصلہ کر لیا ہے، جبکہ قومی یکجہتی اور حب الوطنی کے فروغ کے لیے خصوصی فلموں، ڈراموں اور آگاہی مہمات شروع کرنے کی بھی منظوری دے دی گئی۔
یہ فیصلہ صوبائی وزیر اطلاعات عظمی بخاری کی زیرِ صدارت ہونے والے انفارمیشن اسٹیئرنگ کمیٹی کے اہم اجلاس میں کیا گیا، جس میں سیکرٹری اطلاعات طاہر رضا ہمدانی سمیت دیگر متعلقہ حکام اور نمائندگان نے شرکت کی۔
اجلاس میں فیصلہ کیا گیا کہ فلم فنڈ کے تحت “معرکۂ حق” اور قومی یکجہتی کے موضوعات پر مبنی فلمیں تیار کی جائیں گی، جبکہ Alhamra Arts Council کے تحت شہید لیاقت پر خصوصی ڈرامہ بھی بنایا جائے گا۔
اجلاس کے دوران یہ بھی طے پایا کہ تعلیمی نصاب میں حب الوطنی، قومی سلامتی اور “معرکۂ حق” سے متعلق مضامین شامل کیے جائیں گے تاکہ طلبہ میں قومی شعور اور یکجہتی کو فروغ دیا جا سکے۔
شرکاء نے اس بات پر بھی زور دیا کہ نجی تعلیمی اداروں میں قومی یکجہتی سے متعلق سرگرمیاں سرکاری اداروں کے مقابلے میں محدود رہی ہیں، جس کے بعد نجی اسکولوں میں بھی ایسے پروگرامز کے نفاذ کی ہدایت جاری کر دی گئی۔
اجلاس میں قومی یکجہتی کے فروغ کے لیے ایک جامع عوامی آگاہی مہم شروع کرنے کا فیصلہ بھی کیا گیا، جبکہ شرکاء نے ڈی جی آئی ایس پی آر سے تعلیمی اداروں کے دورے جاری رکھنے کی درخواست بھی کی۔
