برسلز: ایف آئی ایچ پرو ہاکی لیگ 2026 میں شرکت کے لیے پاکستان ہاکی ٹیم بیلجیم کے دارالحکومت برسلز پہنچ گئی، جہاں پاکستانی سفارت خانے کے حکام نے قومی دستے کا پرتپاک استقبال کیا۔
طویل فضائی سفر اور تھکاوٹ کے باوجود قومی ٹیم نے اپنے شیڈول کے مطابق پہلا ٹریننگ سیشن مکمل کیا اور آئندہ مقابلوں کے لیے بھرپور تیاریوں کا آغاز کر دیا۔ ٹیم انتظامیہ کا کہنا ہے کہ کھلاڑیوں کا مورال بلند ہے اور وہ بین الاقوامی ایونٹ میں مثبت نتائج کے لیے پرعزم ہیں۔
پرو ہاکی لیگ کے شیڈول کے مطابق پاکستان اپنا پہلا میچ 13 جون کو میزبان بیلجیم کے خلاف کھیلے گا، جبکہ 14 جون کو قومی ٹیم اسپین کے مدمقابل آئے گی۔ اس کے بعد 19 جون کو ایک بار پھر بیلجیم اور 20 جون کو اسپین کے خلاف میچ شیڈول ہیں۔
بیلجیم میں اپنے مقابلے مکمل کرنے کے بعد قومی ٹیم 21 جون کو لندن روانہ ہوگی، جہاں لیگ کے دوسرے مرحلے میں شرکت کرے گی۔ لندن میں پاکستان 23 جون کو روایتی حریف بھارت کے خلاف میدان میں اترے گا، جبکہ 24 جون کو انگلینڈ کا سامنا کرے گا۔ بعد ازاں 26 جون کو دوبارہ بھارت اور 27 جون کو انگلینڈ کے خلاف میچ کھیلے جائیں گے۔
پاکستان ہاکی ٹیم کے لیے یہ ٹورنامنٹ انتہائی اہمیت کا حامل ہے، کیونکہ لیگ میں اپنی پوزیشن برقرار رکھنے کے لیے قومی ٹیم کو آٹھ میچوں میں سے کم از کم دو میچ اچھے مارجن سے جیتنا ضروری ہوگا۔ ہاکی ماہرین کے مطابق یورپی ٹیموں کے خلاف یہ مقابلے قومی کھلاڑیوں کے لیے اپنی صلاحیتوں کے اظہار اور عالمی سطح پر پاکستان کی ساکھ بہتر بنانے کا بہترین موقع ہیں۔
شائقین ہاکی کی نظریں خصوصاً پاکستان اور بھارت کے درمیان ہونے والے دو ہائی پروفائل مقابلوں پر مرکوز ہیں، جن سے ایک بار پھر روایتی حریفوں کے درمیان دلچسپ اور سنسنی خیز مقابلے دیکھنے کی توقع کی جا رہی ہے۔
