جنوبی لبنان میں اسرائیلی فوج کی جانب سے کیے گئے تازہ ڈرون حملوں میں الریحان میونسپلٹی کے میئر سمیت کم از کم 4 افراد جاں بحق ہوگئے، جبکہ مختلف علاقوں میں فضائی حملوں اور گولہ باری کے باعث خطے میں کشیدگی مزید بڑھ گئی ہے۔
لبنانی سرکاری خبر رساں ایجنسی کے مطابق اسرائیلی ڈرونز نے ضلع جیزین کے علاقوں الریحان اور کفرہنہ کو نشانہ بنایا۔ حملوں کے نتیجے میں الریحان میونسپلٹی کے میئر سمیت چار افراد جان کی بازی ہار گئے۔ مقامی حکام کے مطابق متاثرہ علاقوں میں امدادی کارروائیاں جاری ہیں جبکہ نقصان کا مکمل تخمینہ لگایا جا رہا ہے۔
رپورٹ کے مطابق اسرائیلی فوج نے جنوبی لبنان کے دیگر علاقوں میں بھی کارروائیاں جاری رکھیں۔ ضلع مرجعیون کے قصبے خیام پر فضائی حملے کیے گئے، جبکہ ضلع نباطیہ کے علاقے قصیبہ کو بھی ڈرون حملوں کا نشانہ بنایا گیا۔
دوسری جانب ضلع صور کے علاقے مجدل زون میں اسرائیلی توپ خانے کی گولہ باری کی اطلاعات بھی سامنے آئی ہیں، جس کے باعث مقامی آبادی میں خوف و ہراس پھیل گیا ہے۔ لبنانی حکام کا کہنا ہے کہ حالیہ حملے خطے میں جاری کشیدگی کو مزید ہوا دے سکتے ہیں۔
