کشمیر اسمبلی کی پاکستان سے منتخب 12 نشستیں ختم کرنے کا مطالبہ انتخابی عمل کو سبوتاژ کرنے کے مترادف ہے : خواجہ آصف
وزیر دفاع خواجہ آصف نے کہا ہے کہ 27 جولائی کو آزاد کشمیر کے الیکشن ہیں، ایکشن کمیٹی کا مطالبہ ہے کشمیر اسمبلی کی پاکستان سے منتخب ہونے والی 12 نشستیں ختم کی جائیں، الیکشن سے پہلے یہ مطالبہ انتخابی عمل کو سبوتاژ کرنے کے مترادف ہے۔
اپنے ایکس (ٹویٹ) اکاؤنٹ پر پوسٹ میں انہوں نے لکھا کہ جمہوری سوچ کا تقاضا ہے کہ جو لوگ یہ مطالبہ کررہے ہیں وہ یہ معاملہ 27 جولائی کو عوام کے سامنے رکھیں اور خلق خدا کو یہ فیصلہ کرنے دیں اور نمائندگی کی شکل تشکیل کرنے دیں یہ جمہوری سوچ ہوگی ورنہ یہ بلیک میلنگ تصور ہوگی۔
ان کا کہنا تھا کہ سیالکوٹ شہر اور تحصیل سے کشمیر اسمبلی کی ایک مکمل سیٹ ہے اور پاکستان قومی اسمبلی کی دو نشستیں ہیں، باقی پاکستان میں کشمیر اسمبلی کے حلقے پھیلے ہوئے ہیں ، یہاں کشمیری مہاجروں کی زیادہ تعداد جموں سے ہے، اکتوبر 1947ء میں مہاجر دو لاکھ سے زائد جانوں کی قربانی دے کر سیالکوٹ شہر اور تحصیل میں آکر بسے ، آپ کس طرح ان مہاجروں کو ان کے حق سے محروم کرسکتے ہیں؟
خواجہ آصف نے مزید کہا کہ کئی دہائیاں ان مہاجروں نے نہایت کسمپرسی کی حالت میں گزاریں، زندگی کی بنیادی سہولتوں سے محروم رہےان لوگوں نے آزادی کی بہت مہنگی قیمت ادا کی ہوئی ہے، اپنی رائے کو تسلیم کرانے کے لیے جمہوری رستہ اپنائیں۔
