ہائیکورٹس کے ججز کے خلاف شکایات پر غور کے لیے سپریم جوڈیشل کونسل، سائلین کو بروقت انصاف کی فراہمی یقینی بنانے سے متعلق قومی عدالتی پالیسی ساز کمیٹی اور ہائیکورٹس میں نئے ججز کی تقرریوں اور موجودہ ہائیکورٹس کے ججز کی کارکردگی سے متعلق طریقہ کار طے کرنے کے حوالے سے رولز کی منظوری کے لیے جوڈیشل کمیشن کے اجلاس کی صدارت چیف جسٹس پاکستان یحیٰی آفریدی کریں گے۔
ذرائع کے مطابق چیف جسٹس پاکستان یحییٰ آفریدی تینوں اجلاسوں کی صدارت 11 جون کو کریں گے اعلی عدلیہ کے ججز کے خلاف شکایات سے متعلق سپریم جوڈیشل کونسل کا اجلاس ہوگا، اجلاس میں تمام ہائی کورٹس کے ججز کے خلاف شکایات کا ازسر نو جائزہ لیا جائے گا۔
ہائی کورٹس میں نئے ججز کی تقرریوں کے طریقہ کار اور موجودہ ہائی کورٹس کے ججز کی کارکردگی کا جائزہ لینے سے متعلق رولز کے حوالے سے جوڈیشل کمیشن کا اجلاس ہوگا، اجلاس کی صدارت چیف جسٹس پاکستان یحییٰ آفریدی کریں گے، اجلاس میں رولز کی حتمی منظوری دیے جانے کا امکان ہے جس کے بعد نئے ججز کی تقرری کے حوالے سے امیدواروں کے انٹرویو ہوں گے جبکہ موجودہ ہائی کورٹس کے ججز کی کارکردگی کا جائزہ لینے کے حوالے سے بھی طریقہ کار وضع کیا جائے گا۔
اس کے بعد قومی عدالتی پالیسی ساز میکنگ کمیٹی کا اجلاس بھی 11 جون کو ہوگا، اجلاس کی صدارت چیف جسٹس پاکستان جسٹس یحیٰی آفریدی کریں گے، اجلاس میں تمام ہائی کورٹس کے چیف جسٹس صاحبان شرکت کریں گے، سائلین کو بروقت انصاف کی فراہمی یقینی بنانے سے متعلق تمام ہائی کورٹس کی جانب سے کیے گئے اقدامات کا جائزہ لیا جائے گا جبکہ سائلین کو بروقت انصاف کی فراہمی یقینی بنانے اور پرانے مقدمات فوری نمٹانے کے حوالے سے بھی احکامات جاری کیے جائیں گے۔
اس کے علاوہ تمام ہائی کورٹس اپنے اپنے صوبوں سے متعلق کیے گئے اقدامات کے حوالے سے آگاہ کریں گی۔
