آئی سی سی نے پاکستان کو ایک اور میگا ایونٹ کی میزبانی سونپ دی ہے۔ آئی سی سی کی منظوری کے بعد پاکستان آئی سی سی ویمن کرکٹ ورلڈ کپ 2028 کی میزبانی کرے گا، جس سے عالمی کرکٹ میں پاکستان کی حیثیت مزید مستحکم ہو گئی ہے۔
آئی سی سی بورڈ کے حالیہ اجلاس میں ویمنز ٹی20 ورلڈ کپ 2028 کے کوالیفکیشن پاتھ وے اور ایونٹ کے ابتدائی انتظامات کی منظوری دی گئی۔ ٹورنامنٹ میں دنیا بھر کی 12 بہترین خواتین کرکٹ ٹیمیں شرکت کریں گی اور عالمی اعزاز کے لیے مدمقابل ہوں گی۔
منظور شدہ فارمیٹ کے مطابق 10 ٹیمیں براہِ راست ایونٹ کے لیے کوالیفائی کریں گی۔ ان میں 2026 ویمنز ٹی20 ورلڈ کپ کی ٹاپ آٹھ ٹیمیں، میزبان پاکستان (اگر پہلے سے کوالیفائی نہ کرے) اور 6 جولائی 2026 تک آئی سی سی ویمنز ٹی20 انٹرنیشنل رینکنگ میں اگلی بلند ترین درجہ بندی رکھنے والی ٹیم شامل ہوگی۔
باقی دو ٹیموں کا انتخاب گلوبل کوالیفائر ٹورنامنٹ کے ذریعے کیا جائے گا، جس میں مختلف علاقائی کوالیفائنگ مقابلوں سے کامیاب ہونے والی ٹیمیں شرکت کریں گی۔
آئی سی سی رپورٹ کے مطابق پاکستان اور بھارت کے درمیان طے شدہ ہائبرڈ ماڈل کے تحت بھارتی ٹیم کے تمام میچز نیوٹرل وینیو پر کھیلے جائیں گے۔ اس فیصلے کا مقصد دونوں ممالک کے درمیان موجود سفری اور سیکیورٹی معاملات کو مدنظر رکھتے ہوئے ٹورنامنٹ کے انعقاد کو یقینی بنانا ہے۔
آئی سی سی نے واضح کیا ہے کہ ٹورنامنٹ کے وینیوز، شیڈول، علاقائی کوالیفکیشن الاٹمنٹ اور دیگر انتظامی تفصیلات جولائی میں ہونے والے آئندہ بورڈ اجلاس میں حتمی شکل دی جائیں گی۔
یہ ایونٹ پاکستان کے لیے نہ صرف عالمی سطح پر خواتین کرکٹ کو فروغ دینے کا ایک اہم موقع ہوگا بلکہ ملکی کھیلوں، سیاحت اور بین الاقوامی ساکھ کے لیے بھی مثبت پیش رفت ثابت ہو سکتا ہے۔
