برطانوی میڈیا رپورٹس کے مطابق پاکستان قومی ٹیم اگلے سال مئی میں انگلیڈ قومی ٹیم کے خلاف ایک واحد ٹیسٹ میچ کھیلے گی، جسے میزبان ٹیم کی ایشز سیریز سے قبل تیاریوں کا اہم حصہ قرار دیا جا رہا ہے۔
رپورٹس کے مطابق یہ مجوزہ ٹیسٹ میچ ایسے وقت میں شیڈول کیا جا رہا ہے جب انڈین پریمئیر لیگ بھی جاری ہوگی، جس کے باعث انگلینڈ کے کئی اہم کھلاڑی لیگ میں مصروف ہونے کی وجہ سے ٹیسٹ کرکٹ سے دور رہ سکتے ہیں۔
برطانوی میڈیا کا کہنا ہے کہ پاکستان نے 2027 میں وائٹ بال سیریز کیلئے انگلینڈ کا دورہ کرنا ہے جبکہ انگلینڈ کے شیڈول میں ایشز سے قبل ایک ٹیسٹ میچ کی گنجائش موجود تھی، جسے پاکستان کے خلاف استعمال کرنے پر غور کیا جا رہا ہے۔
رپورٹس میں مزید بتایا گیا ہے کہ انگلینڈ کی مستقبل کی مصروفیات اولمپکس سے بھی متاثر ہو سکتی ہیں۔ سمر 2028 میں ویسٹ انڈیز کرکٹ ٹیم اور انگلینڈ کے درمیان تین ٹیسٹ میچز کی سیریز طے ہے، تاہم اسی دوران اولمپکس کھیل بھی منعقد ہوں گے۔
اولمپکس مقابلے 14 جولائی سے 30 جولائی تک جاری رہیں گے، جس کے باعث انگلینڈ کے متعدد آل فارمیٹ کھلاڑی اولمپکس میں شرکت کیلئے ٹیسٹ سیریز سے باہر ہو سکتے ہیں۔
