پاکستان کرکٹ بورڈ نے قومی وائٹ بال ٹیم کے لیے نئے بیٹنگ کوچ کی تلاش کا باضابطہ آغاز کر دیا ہے اور اس سلسلے میں اشتہار بھی جاری کر دیا گیا ہے۔
پی سی بی کی جانب سے جاری کردہ اشتہار کے مطابق بیٹنگ کوچ کے امیدوار کے لیے کم از کم لیول ٹو کوچنگ سرٹیفکیٹ لازمی قرار دیا گیا ہے، جبکہ امیدوار کے پاس بیٹنگ کوچنگ کا کم از کم پانچ سالہ تجربہ ہونا بھی ضروری ہوگا۔
بورڈ نے دلچسپی رکھنے والے امیدواروں کو ہدایت کی ہے کہ وہ اپنے کاغذات اور درخواستیں 7 جون تک جمع کرا دیں۔
ذرائع کے مطابق نئے بیٹنگ کوچ کی تقرری قومی وائٹ بال ٹیم کے لیے کی جائے گی۔ اس وقت قومی ٹیم کے ساتھ حنیف ملک بیٹنگ کوچ کی ذمہ داریاں انجام دے رہے ہیں، تاہم اطلاعات ہیں کہ آسٹریلیا کے خلاف آئندہ سیریز ان کی بطور کوچ آخری اسائنمنٹ ہوگی۔
ذرائع کا کہنا ہے کہ حنیف ملک چند ہفتے قبل اپنے عہدے سے علیحدگی کا فیصلہ کر چکے تھے اور اس وقت نوٹس پیریڈ پر کام کر رہے ہیں۔
قومی ٹیم کے لیے نئے بیٹنگ کوچ کی تلاش ایسے وقت میں شروع کی گئی ہے جب پاکستان ٹیم اپنی وائٹ بال کرکٹ کی کارکردگی بہتر بنانے اور مستقبل کے بڑے عالمی مقابلوں کی تیاریوں میں مصروف ہے۔
