پاکستانی شوبز انڈسٹری کی معروف اداکارہ Momina Iqbal کی شادی کی تاریخ سامنے آ گئی ہے، جس کی تصدیق ان کی بہن رمشا اقبال نے کی ہے۔
گزشتہ کئی روز سے سوشل میڈیا پر مومنہ اقبال کی شادی سے متعلق خبریں گردش کر رہی تھیں، تاہم اب اداکارہ کی بہن Ramsha Iqbal نے میڈیا سے گفتگو میں ان خبروں کی تصدیق کر دی ہے۔
رمشا اقبال کے مطابق مومنہ اقبال کا نکاح یکم جون کو محمد حمزہ حبیبی کے ساتھ ہوگا۔ انہوں نے بتایا کہ یہ رشتہ خاندان کی رضا مندی سے طے پایا ہے اور مومنہ کے ہونے والے شوہر ان کے رشتہ دار نہیں ہیں۔
یہ پیشرفت ایسے وقت میں سامنے آئی ہے جب اداکارہ مومنہ اقبال حالیہ دنوں میں ہراسانی اور دھمکیوں کے معاملے کے باعث مشکلات کا سامنا کر رہی ہیں۔
اداکارہ نے حال ہی میں انکشاف کیا تھا کہ ایک بااثر سیاسی شخصیت کی جانب سے انہیں اور ان کے اہلخانہ کو جان سے مارنے کی دھمکیاں دی جا رہی ہیں، جس کے بعد انہوں نے سوشل میڈیا پر بھی اس معاملے سے متعلق بیان جاری کیا تھا۔
رمشا اقبال، جو پیشے کے اعتبار سے وکیل ہیں، اس کیس کی قانونی پیروی بھی کر رہی ہیں۔ ان کا کہنا ہے کہ متعلقہ اداروں کو تمام شواہد فراہم کر دیے گئے ہیں اور معاملے میں پیشرفت مثبت رہی ہے۔
انہوں نے مزید بتایا کہ حکومتی سطح پر مومنہ اقبال، ان کے اہلخانہ اور سسرال والوں کو بھی سیکیورٹی فراہم کی گئی ہے کیونکہ انہیں بھی دھمکیوں کا سامنا رہا۔
رمشا اقبال کے مطابق وہ اس کیس کو منطقی انجام تک پہنچانے کے لیے قانونی جنگ جاری رکھیں گی جبکہ میڈیا اور عوامی حمایت پر انہوں نے شکریہ بھی ادا کیا۔
