راولپنڈی انڈر 17 کرکٹ ٹیم نے پہلی اننگز میں 97 رنز کے خسارے کے باوجود زبردست کم بیک کرتے ہوئے قومی انڈر 17 ٹورنامنٹ کا ٹائٹل اپنے نام کر لیا۔ اقبال اسٹیڈیم فیصل آباد میں کھیلے گئے سنسنی خیز فائنل میں راولپنڈی نے ایبٹ آباد انڈر 17 کو 229 رنز کے ہدف کے تعاقب میں صرف 103 رنز پر ڈھیر کر دیا۔
فائنل کے آخری روز راولپنڈی کے بولرز نے شاندار کارکردگی کا مظاہرہ کرتے ہوئے میچ کا پانسہ پلٹ دیا۔ لیگ اسپنر محمد الیان نے دوسری اننگز میں تباہ کن بولنگ کرتے ہوئے 17 رنز کے عوض 4 کھلاڑیوں کو پویلین واپس بھیجا، جبکہ اذان احمد نے بھی 3 اہم وکٹیں حاصل کر کے ایبٹ آباد کی بیٹنگ لائن کو مشکلات سے دوچار رکھا۔
محمد الیان نے میچ میں مجموعی طور پر 7 وکٹیں حاصل کیں جس پر انہیں پلیئر آف دی میچ قرار دیا گیا۔ ان کی عمدہ بولنگ نے راولپنڈی کی فتح میں کلیدی کردار ادا کیا۔
ٹورنامنٹ جیتنے پر راولپنڈی انڈر 17 ٹیم کو 10 لاکھ روپے انعام دیا گیا، جبکہ رنر اپ ایبٹ آباد انڈر 17 ٹیم نے 5 لاکھ روپے کی انعامی رقم حاصل کی۔
ٹورنامنٹ کے اختتام پر انفرادی اعزازات بھی تقسیم کیے گئے۔ ایبٹ آباد کے محمد صائم کو ٹورنامنٹ کا بہترین کھلاڑی اور بہترین بولر قرار دیا گیا۔ انہوں نے پورے ایونٹ میں شاندار بولنگ کرتے ہوئے 46 وکٹیں حاصل کیں جبکہ 136 رنز بھی اسکور کیے۔
دوسری جانب راولپنڈی کے محمد یوسف 652 رنز بنا کر ٹورنامنٹ کے بہترین بیٹر قرار پائے۔ ان کی مسلسل عمدہ بیٹنگ کارکردگی نے راولپنڈی کو فائنل تک رسائی دلانے میں اہم کردار ادا کیا۔
ماہرین کرکٹ کے مطابق اس ٹورنامنٹ میں نوجوان کھلاڑیوں کی کارکردگی پاکستان کرکٹ کے مستقبل کے لیے خوش آئند اشارہ ہے، جبکہ کئی باصلاحیت کھلاڑی مستقبل میں قومی سطح پر نمائندگی کے مضبوط امیدوار بن کر سامنے آئے ہیں۔
