معرکۂ حق کے ایک سال مکمل ہونے پر اپنے ایک خصوصی انٹرویو میں پاکستان کے سفیر رضوان سعید شیخ نے کہا ہے کہ پاکستان خطے میں اپنی دفاعی، سفارتی اور سیاسی حکمتِ عملی کی بنیاد پر استحکام کے ایک اہم عامل کے طور پر ابھرا ہے۔
سفیر پاکستان نے کہا کہ پہلگام واقعے کے بعد پاکستان نے فوری طور پر تحقیقات کا مطالبہ کیا، جبکہ بھارت نے بغیر کسی ثبوت کے الزامات عائد کرتے ہوئے غیر قانونی جارحیت کا ارتکاب کیا، پاکستان مسلسل خبردار کرتا رہا کہ جوہری صلاحیت رکھنے والے خطے میں کسی بھی قسم کی مہم جوئی کی گنجائش نہیں۔
رضوان سعید شیخ کا کہنا تھا کہ جارحیت کے باوجود پاکستان نے سیاسی، سفارتی اور عسکری پختگی کا مظاہرہ کیا، جس سے بین الاقوامی سطح پر قومی وقار میں اضافہ ہوا، پاکستان کے دفاعی اخراجات بھارت کے مقابلے میں بہت کم ہیں، مگر اصل طاقت دفاعی صلاحیت، قومی عزم اور عوامی اخوت میں پوشیدہ ہے۔
انہوں نے امریکی صدر ڈونلڈ ٹرمپ اور ان کی ٹیم کے کردار کو سراہتے ہوئے کہا کہ انہوں نے قیامِ امن میں فعال کردار ادا کیا، جسے دنیا نے تسلیم کیا، پاکستان نے معرکۂ حق میں حقائق اور تدبر کی بنیاد پر اپنا مؤقف پیش کیا، جس سے ملک کی عالمی ساکھ مزید مضبوط ہوئی۔
پاکستانی سفیر نے کہا کہ عالمی ذرائع ابلاغ اور سوشل میڈیا کے دور میں بھارتی بیانیے کی کمزوریاں دنیا کے سامنے واضح ہو گئیں، پاکستان آج بھی پلوامہ اور پہلگام واقعات کے ثبوت مانگ رہا ہے اور دنیا بھی اسی انتظار میں ہے۔
رضوان سعید شیخ نے سندھ طاس معاہدے کے حوالے سے کہا کہ اس معاہدے میں ایسی کوئی شق موجود نہیں جس کے تحت اسے معطل کیا جا سکے، پانی کو ہتھیار کے طور پر استعمال کرنا جارحیت اور بین الاقوامی قوانین کی خلاف ورزی کے مترادف ہوگا، اگر پاکستان کے پانی یا سالمیت کو خطرہ لاحق ہوا تو پاکستان اپنے حقِ دفاع کا بھرپور استعمال کرے گا۔
ان کا کہنا تھا کہ گلوبل ٹیررزم انڈیکس کے مطابق پاکستان دہشت گردی سے سب سے زیادہ متاثرہ ممالک میں شامل ہے، امریکہ میں پاکستانی کمیونٹی اور دیگر اقوام کی جانب سے پاکستان کے عالمی امن میں کردار کو کھل کر سراہا جا رہا ہے اور ہر سطح پر شکریہ ادا کیا جا رہا ہے۔
سفیر پاکستان نے کہا کہ “بنیان مرصوص” کے تصور کی تکمیل تب ہوگی جب پاکستان کی معیشت بھی اس کے دفاع کی طرح ناقابلِ تسخیر بنے گی، انہوں نے اندرون و بیرون ملک مقیم پاکستانیوں پر زور دیا کہ وہ قومی جذبے اور پاکستانیت کو بروئے کار لاتے ہوئے مادرِ وطن کی ترقی کے لیے متحد ہو کر کام کریں۔
رضوان سعید شیخ کا کہنا تھا کہ معرکۂ حق کی اہمیت اور افادیت ماضی اور حال دونوں کے تناظر میں مسلمہ ہے، جبکہ مستقبل کے حوالے سے سب سے اہم نکتہ ”ارادیت“ ہے، جو معاشی ترقی کے مصمم ارادے اور فکر و عمل کی یکجہتی سے عبارت ہے۔
انہوں نے مزید کہا ہے کہ پاکستان اور امریکہ سمیت دنیا کے تمام دیرپا تعلقات کی اصل بنیاد معاشی روابط ہیں، اسی لیے پاکستانی امریکی کمیونٹی دونوں ممالک کے درمیان ایک اہم پل کا کردار ادا کر رہی ہے، سفیر پاکستان نے اس عزم کا اظہار بھی کیا کہ پاکستان کی حالیہ عالمی پذیرائی کو منافع بخش شراکت داریوں میں تبدیل کرنا وقت کی اہم ضرورت ہے۔
