سعودی عرب کے حکام نے واضح کیا ہے کہ مملکت نے اپنی فضائی حدود کسی بھی جارحانہ کارروائی کے لیے استعمال کرنے کی اجازت نہیں دی۔
عرب نیوز کے مطابق سعودی حکام کا کہنا ہے کہ بعض عناصر سعودی عرب کے مؤقف کو غلط انداز میں پیش کر رہے ہیں، جو درست نہیں۔
حکام نے کہا کہ سعودی عرب خطے میں کشیدگی کم کرنے کی کوششوں کی حمایت کرتا ہے اور اس مقصد کے لیے کی جانے والی ثالثی کوششوں، بشمول پاکستان کی کوششوں، کے ساتھ کھڑا ہے۔
بیان میں مزید بتایا گیا کہ ابتدائی مرحلے میں ایک عسکری کارروائی کے آغاز کے وقت سعودی عرب نے امریکی افواج کے لیے اپنی فضائی حدود جزوی طور پر محدود کی تھیں، تاہم بعد میں آپریشن سے متعلق صورتحال واضح ہونے کے بعد یہ پابندی ہٹا دی گئی۔
سعودی حکام کے مطابق مملکت کی پالیسی خطے میں استحکام، کشیدگی میں کمی اور تنازعات کے سفارتی حل کے اصولوں پر مبنی ہے۔
انہوں نے زور دیا کہ سعودی عرب اپنی فضائی، زمینی اور بحری حدود کو کسی بھی ایسی سرگرمی کے لیے استعمال نہیں ہونے دے گا جو خطے میں امن و سلامتی کو متاثر کرے۔
