پاکستان ویمنز کرکٹ ٹیم کے آئرلینڈ ٹرائی سیریز اور آئندہ ورلڈ کپ کی تیاریوں کے سلسلے میں تربیتی کیمپ کا آغاز لاہور میں کر دیا گیا۔
کیمپ کے پہلے روز کھلاڑیوں نے کوچنگ اسٹاف کے ساتھ مختلف سیشنز میں شرکت کی، جہاں ٹیم کوچز اور کھلاڑیوں کے درمیان ون آن ون ملاقاتیں بھی ہوئیں۔ ان سیشنز میں ٹیم حکمت عملی، انفرادی کارکردگی اور آنے والے ایونٹس کی تیاریوں پر تفصیلی تبادلہ خیال کیا گیا۔
تربیتی کیمپ کے دوران کھلاڑیوں کی مختلف تکنیکی اور جسمانی صلاحیتوں کا جائزہ لیا گیا جبکہ فٹنس ٹیسٹنگ بھی کی گئی۔
پاکستان کرکٹ بورڈ کے میڈیکل اسٹاف نے کھلاڑیوں کی فٹنس، اسٹرینتھ، برداشت اور دیگر فزیکل پیرامیٹرز کا تفصیلی معائنہ کیا تاکہ آئندہ بین الاقوامی مقابلوں کے لیے کھلاڑیوں کی مکمل تیاری کو یقینی بنایا جا سکے۔
