امریکی صدر ڈونلڈ ٹرمپ نے اپنے سابق ذاتی وکیل ٹوڈ بلانچ کو مستقل بنیادوں پر امریکا کے اٹارنی جنرل کے عہدے کے لیے نامزد کر دیا ہے، جس کے بعد سینیٹ میں ان کی توثیق کے لیے ایک سخت سیاسی معرکے کی توقع ظاہر کی جا رہی ہے۔
ٹوڈ بلانچ اس سے قبل اپریل میں سابق اٹارنی جنرل پام بونڈی کے عہدہ چھوڑنے کے بعد قائم مقام اٹارنی جنرل کے طور پر فرائض انجام دے رہے تھے۔ اب صدر ٹرمپ نے انہیں مستقل طور پر ملک کے اعلیٰ ترین قانونی منصب کے لیے نامزد کیا ہے۔
قائم مقام اٹارنی جنرل کے طور پر اپنے دور میں ٹوڈ بلانچ متعدد متنازع اقدامات اور بیانات کی وجہ سے سیاسی توجہ کا مرکز رہے۔ انہوں نے سابق ایف بی آئی ڈائریکٹر جیمز کومی پر الزام عائد کیا تھا کہ ان کے بعض بیانات اور اقدامات سے صدر ٹرمپ کی جان کو خطرات لاحق ہوئے۔ جیمز کومی طویل عرصے سے ٹرمپ کے نمایاں ناقدین میں شمار ہوتے ہیں۔
