قومی اسمبلی کا اجلاس ایک بار پھر کورم بحران کی نذر ہوگیا۔ وزیر مملکت داخلہ نے بتایا کمبوڈیا میں 4 پاکستانی جاں بحق ہو گئے. ریلوے حادثات کی تفصیلات بھی ایوان میں پیش کر دی گئیں۔
اسپیکر سردار ایاز صادق کی زیر صدارت اجلاس میں اپوزیشن رکن اقبال آفریدی نے کورم کی نشان دہی کی۔ اسپیکر کی جانب سے گنتی کا حکم دیا گیا مگر حکومت مطلوبہ تعداد پوری نہ کرسکی۔ کورم مکمل نہ ہونے پر اجلاس کچھ دیر کے لیے ملتوی کردیا گیا۔
وقفے کے بعد اجلاس دوبارہ شروع ہوا تو اپوزیشن لیڈر بیرسٹر گوہر نے سخت احتجاج کرتے ہوئے کہا کہ اپوزیشن کی آواز دبائی جارہی ہے۔انہوں نے الزام عائد کیا کہ تقاریر نشر نہیں کی جاتیں اور سیاسی رہنماؤں کی ملاقاتوں میں رکاوٹیں ڈالی جاتی ہیں۔
ایوان میں پیش دستاویزات کے مطابق گزشتہ 5 برس میں ریلوے کے 448 حادثات پیش آئے۔ 164 بڑے حادثات میں 169 افراد جان کی بازی ہار گئے۔
قومی اسمبلی اجلاس کے دوران مختلف میڈیا ہاؤسز سے واجبات کی عدم ادائیگی کے خلاف پارلیمانی صحافیوں نے پریس گیلری سے واک آؤٹ بھی کیا۔ اجلاس میں حکومتی اور اپوزیشن ارکان نے کچے کے علاقوں میں ڈاکوؤں کے خلاف مؤثر آپریشن کا مطالبہ کیا۔
وزیر مملکت داخلہ نے بتایا کہ پنجاب اور سندھ حکومتیں مشترکہ آپریشن کررہی ہیں اور ایک ڈاکو ہلاک بھی ہوچکا ہے۔دن بھر ہنگامہ آرائی، احتجاج اور اہم انکشافات کے بعد قومی اسمبلی کا اجلاس غیر معینہ مدت تک ملتوی کردیا گیا۔
