ایران نے امریکی حملوں اور حالیہ فوجی جھڑپوں کے بعد آبنائے ہرمز سے تمام بحری آمد و رفت معطل کرنے کا اعلان کیا ہے۔ ایرانی فوجی حکام نے خبردار کیا ہے کہ پابندی کی خلاف ورزی کرنے والے جہازوں کو نشانہ بنایا جائے گا۔
تہران: ایران نے امریکہ کے ساتھ بڑھتی ہوئی کشیدگی اور حالیہ فوجی جھڑپوں کے بعد عالمی توانائی تجارت کی اہم گزرگاہ آبنائے ہرمز میں تمام بحری آمد و رفت معطل کرنے کا اعلان کر دیا ہے، جس سے عالمی منڈیوں اور خطے کی سلامتی کے حوالے سے نئی تشویش پیدا ہو گئی ہے۔
ایرانی اعلیٰ مشترکہ فوجی کمان کے مطابق آبنائے ہرمز سے گزرنے کی کوشش کرنے والے کسی بھی جہاز کو ممکنہ ہدف سمجھا جائے گا۔ فوجی حکام نے واضح کیا کہ پابندی صرف فوجی جہازوں تک محدود نہیں بلکہ اس کا اطلاق تیل بردار ٹینکروں اور تجارتی بحری جہازوں پر بھی ہوگا۔
ایرانی فوجی کمان نے اپنے بیان میں کہا کہ موجودہ سکیورٹی صورتحال اور بیرونی جارحیت کے پیش نظر آبنائے ہرمز کی بندش کا فیصلہ کیا گیا ہے۔ حکام کے مطابق خطے میں کسی بھی قسم کی غیر مجاز بحری نقل و حرکت برداشت نہیں کی جائے گی۔
ایرانی ذرائع ابلاغ نے دعویٰ کیا ہے کہ نئی پابندی کے نفاذ کے بعد آبنائے ہرمز میں دو جہازوں کو نشانہ بنایا گیا ہے۔ تاہم ان جہازوں کی شناخت، نقصان کی نوعیت یا جانی نقصان کے حوالے سے فوری طور پر کوئی تفصیلات جاری نہیں کی گئیں۔
