امریکی سینٹرل کمانڈ (سینٹ کام) نے اعلان کیا ہے کہ ایران کے خلاف شروع کی گئی دفاعی فوجی کارروائیاں مکمل کر لی گئی ہیں۔ امریکی فوج کے مطابق ان حملوں کا مقصد امریکی افواج، بحری مفادات اور بین الاقوامی تجارتی جہاز رانی کو درپیش مبینہ خطرات کا جواب دینا تھا۔
سینٹ کام کی جانب سے جاری بیان میں کہا گیا کہ کارروائی کے دوران ایران کے کمیونیکیشن نیٹ ورکس اور فضائی دفاعی نظام سے متعلق متعدد اہداف کو نشانہ بنایا گیا۔ امریکی حکام کے مطابق یہ حملے خطے میں امریکی مفادات اور بحری نقل و حمل کے تحفظ کے لیے کیے گئے۔
امریکی فوج نے دعویٰ کیا کہ آبنائے ہرمز میں کسی امریکی جنگی جہاز کو نشانہ نہیں بنایا گیا اور اہم تجارتی بحری راستے پر جہازوں کی آمد و رفت معمول کے مطابق جاری ہے۔ بیان میں کہا گیا کہ امریکی افواج نے تمام کارروائیاں اپنے دفاع اور خطے میں استحکام برقرار رکھنے کے مقصد سے انجام دیں۔
واضح رہے کہ امریکا نے گزشتہ رات تقریباً سوا دو بجے ایران کے خلاف نئی فوجی کارروائیوں کا آغاز کیا تھا۔ اس وقت امریکی حکام نے مؤقف اختیار کیا تھا کہ یہ حملے ایران کی جانب سے مبینہ مسلسل اور بلاجواز جارحانہ اقدامات کے جواب میں کیے جا رہے ہیں۔
