پلان کے مطابق وفاقی دارالحکومت میں جلوسوں اور مجالس کی حفاظت کے لیے 15 ہزار سے زائد پولیس، رینجرز اور دیگر قانون نافذ کرنے والے اداروں کے اہلکار فرائض سرانجام دیں گے۔
پولیس حکام کے مطابق وفاقی دارالحکومت میں محرم الحرام کے دوران 177 جلوس اور 929 مجالس منعقد ہوں گی، جن کی نگرانی کے لیے سیف سٹی ہیڈکوارٹرز میں خصوصی کنٹرول روم قائم کر دیا گیا ہے۔
آئی جی اسلام آباد سید علی ناصر رضوی تمام سکیورٹی انتظامات کی خود نگرانی کر رہے ہیں جبکہ جلوسوں اور مجالس پر تعینات اہلکاروں کی ڈیوٹی چیک کرنے کے لیے 10 ویجیلینس ٹیمیں بھی تشکیل دی گئی ہیں۔
سکیورٹی پلان کے تحت اسلام آباد پولیس کے تمام ڈی آئی جیز، ایس ایس پیز اور اے آئی جیز مختلف مقامات پر ڈیوٹی انجام دے رہے ہیں، شہر بھر میں روزانہ کی بنیاد پر سرچ اور کومبنگ آپریشنز بھی جاری ہیں تاکہ کسی بھی ناخوشگوار واقعے سے بروقت نمٹا جا سکے۔
حکام کے مطابق جلوسوں اور مجالس کی نگرانی 3 ہزار سے زائد کیمروں اور ڈرونز کے ذریعے کی جا رہی ہے جبکہ ٹریفک کی روانی برقرار رکھنے کے لیے 500 سے زائد ٹریفک افسران بھی تعینات کیے گئے ہیں۔
اسلام آباد پولیس کا کہنا ہے کہ محرم الحرام کے دوران شہریوں کے جان و مال کے تحفظ اور پرامن ماحول کے قیام کے لیے تمام ضروری اقدامات یقینی بنائے جا رہے ہیں۔
