فیفا ورلڈ کپ 2026: ایران نے امریکہ میں سیاسی اشتعال اور غیر مجاز جھنڈوں پر میچ معطل کرنے کی دھمکی دے دی
ایران کے وزیر کھیل و نوجوانان احمد دونیمالی نے خبردار کیا ہے کہ اگر فیفا ورلڈ کپ 2026 کے دوران ایرانی میچز میں سیاسی علامات یا غیر مجاز جھنڈے آویزاں کیے گئے تو ایران کی ٹیم میچ روکنے کا حق استعمال کر سکتی ہے۔
تہران میں صحافیوں سے گفتگو کرتے ہوئے انہوں نے کہا کہ میزبان ملک کو تمام شریک ٹیموں کے لیے یکساں اور محفوظ ماحول فراہم کرنا فیفا قوانین اور اولمپک چارٹر کے تحت لازمی ہے۔ ان کے مطابق کسی بھی قسم کی سیاسی اشتعال انگیزی یا غیر مجاز علامتوں کی موجودگی میں ایرانی ٹیم کے مینیجرز کو کھیل روکنے کا اختیار حاصل ہوگا۔
وزیر کھیل نے خاص طور پر امریکا پر تنقید کرتے ہوئے کہا کہ ٹورنامنٹ کی میزبانی کے دوران بعض انتظامی اور سکیورٹی معاملات پر غیر پیشہ ورانہ رویہ اپنایا جا رہا ہے، جس پر متعدد ممالک نے بھی تحفظات کا اظہار کیا ہے۔
انہوں نے دعویٰ کیا کہ ورلڈ کپ ٹکٹوں کی فروخت اور کوٹہ سسٹم میں ایرانی شائقین کے ساتھ رکاوٹیں پیدا کی جا رہی ہیں، تاہم ان کے مطابق اس طرح کے اقدامات ایران کی ٹیم کے عزم کو مزید مضبوط کر رہے ہیں۔
ایرانی وزیر نے مزید کہا کہ بعض ویزا مسائل ہر صورت سیاسی نہیں ہوتے، تاہم فیفا کو میزبان ملک کے ساتھ ساتھ تمام ممالک کے لیے مساوی سلوک یقینی بنانا چاہیے۔ انہوں نے اس بات پر بھی تنقید کی کہ بعض بین الاقوامی فیصلے کھیل کے اصولوں کے بجائے سیاسی اثرات کے تحت کیے جاتے ہیں۔
انہوں نے تصدیق کی کہ قومی ٹیم کے لیے انعامی فریم ورک منظور کیا جا چکا ہے اور کھلاڑیوں کو ورلڈ کپ میں اگلے راؤنڈ تک رسائی کا ہدف دیا گیا ہے۔
وزیر کے مطابق ایران آئندہ ایشین اور پیرا ایشین گیمز کے لیے بھی بھرپور تیاری کر رہا ہے، جہاں ایک ہزار سے زائد کھلاڑیوں اور آفیشلز پر مشتمل وفد شرکت کرے گا۔ انہوں نے کہا کہ حالیہ علاقائی کشیدگی کے باوجود کھیلوں کی سرگرمیاں اور تربیتی کیمپس جاری رکھے گئے ہیں۔
