اسرائیل نے اعلان کیا ہے کہ غزہ کی اہم سرحدی گزرگاہوں رفح اور کرم ابو سالم کو کل سے دوبارہ کھول دیا جائے گا، جس کے بعد انسانی امداد کی ترسیل اور محدود پیمانے پر شہریوں کی آمدورفت بحال ہونے کی توقع ہے۔
اسرائیلی حکام کے مطابق رفح کراسنگ کو دونوں جانب سے لوگوں کی محدود نقل و حرکت کے لیے کھولا جائے گا، جبکہ کرم ابو سالم کراسنگ کے ذریعے غزہ میں انسانی امدادی سامان مرحلہ وار داخل کیا جائے گا۔ حکام کا کہنا ہے کہ تمام سرگرمیاں سکیورٹی نگرانی اور طے شدہ ضوابط کے تحت انجام دی جائیں گی۔
رپورٹس کے مطابق امدادی سامان کی ترسیل اور سرحدی آمدورفت کے عمل کو سخت نگرانی میں رکھا جائے گا تاکہ سکیورٹی اور انتظامی تقاضوں کو یقینی بنایا جا سکے۔ توقع کی جا رہی ہے کہ گزرگاہوں کے کھلنے سے غزہ میں انسانی امداد کی فراہمی میں بہتری آئے گی، جہاں طویل عرصے سے بنیادی ضروریات کی قلت اور انسانی بحران کے خدشات موجود ہیں۔
عرب میڈیا کے مطابق اسرائیل نے مارچ میں ایران پر امریکا اور اسرائیل کے مشترکہ حملوں کے بعد غزہ کی سرحدی گزرگاہیں بند کر دی تھیں، جس کے نتیجے میں انسانی امداد کی ترسیل اور شہریوں کی نقل و حرکت شدید متاثر ہوئی تھی۔ سرحدی راستوں کی بندش کے باعث غزہ میں خوراک، ادویات اور دیگر بنیادی اشیائے ضروریہ کی فراہمی بھی مشکلات کا شکار رہی
