کراچی میں وفاقی اردویونیورسٹی کے اساتذہ نے مطالبات کی منظوری تک تدریسی عمل اورامتحانات کےبائیکاٹ کااعلان کردیا جبکہ رجسٹرار پروفیسر ڈاکٹر سید عنایت علی شاہ کاکہناہے کہ وفاقی اردویونیورسٹی کےتمام کیمپسز کے امتحانات مقررہ شیڈول کے مطابق منعقد ہو نگے۔
کراچی میں منعقدہ اساتذہ کی مشترکہ جنرل باڈی میٹنگ میں آٹھ جون سے شروع ہونیوالے امتحانات کے بائیکاٹ کا فیصلہ کیا گیا ۔ اساتذہ نےوائس چانسلر کا دور ناکام قرار دیکر تعلیمی ایمرجنسی نافذ کرنے ۔ چانسلر آصف علی زرداری اور وفاقی وزیر تعلیم ڈاکٹر خالد مقبول صدیقی سے وائس چانسلر کے احتساب کا مطالبہ کر دیا ہے۔
ہاؤس سیلنگ میں 20 فیصد کٹوتی کا فیصلہ واپس لینے کی قراردادمنظور کرتے ہوئے اساتذہ و ملازمین کی ہاؤس سیلنگ اورتنخواہوں کے تمام بقایا جات فوری ادا کرنے کامطالبہ کیا ۔ ریٹائرڈ ملازمین کے واجبات اور پنشن بقایاجات کی فوری ادائیگی ۔ سال 2022 میں مشتہر آسامیوں کے لیے فوری سلیکشن بورڈ منعقد کرنے اور برطرف اساتذہ و ملازمین کی مکمل بحالی اور حقوق کی فراہمی کا مطالبہ بھی کیا گیا ۔
اساتذہ نے جزوقتی اساتذہ کے معاوضوں کی ادائیگی اور میڈیکل پینلزکی بحالی کامطالبہ کرتے ہوئے مشروط داخلہ پالیسی ختم کرکے میرٹ پر داخلے دینے کی قرارداد منظور کی ۔ اعلامیے کے مطابق مطالبات پورے نہ ہونےتک امتحانات اورتدریسی سرگرمیوں کا مکمل بائیکاٹ جاری رہے گا ۔ دوسری جانب رجسٹرار پروفیسر ڈاکٹر سید عنایت علی شاہ کاکہناہے کہ وفاقی اردو یونیورسٹی کے تمام کیمپسز کے امتحانات مقررہ شیڈول کے مطابق منعقد ہونگے ۔ تمام اساتذہ کرام سے گزارش ہے کہ امتحانی ڈیوٹیوں اور اوقات کار میں وقت کی پابندی کو یقینی بنائیں اور امتحانات کے انعقاد میں مکمل تعاون فراہم کریں ۔ طلبہ وطالبات اپنے امتحانات کے شیڈول کےمطابق مقررہ تاریخوں اور اوقات میں امتحانی مراکز پر حاضر ہوں۔
