فیفا ورلڈ کپ 2026 کے آغاز میں صرف سات روز باقی رہ گئے ہیں اور دنیا کے سب سے بڑے فٹبال ایونٹ کی تیاریاں آخری مراحل میں داخل ہو چکی ہیں۔ میزبان ممالک امریکا، کینیڈا اور میکسیکو میں شریک ٹیموں کی آمد کا سلسلہ تیزی سے جاری ہے۔
برازیل کی قومی فٹبال ٹیم امریکا پہنچ گئی ہے، جہاں شائقین نے ٹیم کا پرتپاک استقبال کیا۔ اس موقع پر نیویارک میں فیفا ورلڈ کپ ٹرافی کی خصوصی رونمائی بھی کی گئی، جس نے فٹبال شائقین کے جوش و خروش میں مزید اضافہ کر دیا۔
دوسری جانب ایرانی قومی فٹبال ٹیم کو میکسیکو کے ویزے جاری کر دیے گئے ہیں۔ ایران کی ٹیم اس وقت ترکیے میں تربیتی کیمپ میں موجود ہے اور 6 جون کو میکسیکو روانہ ہوگی۔ ورلڈ کپ کے دوران میکسیکو ایرانی ٹیم کا باضابطہ بیس کیمپ ہوگا، جبکہ اس کے گروپ مرحلے کے میچز امریکا میں کھیلے جائیں گے۔
فیفا ورلڈ کپ 2026 کئی حوالوں سے تاریخی اہمیت کا حامل ہوگا۔ پہلی مرتبہ عالمی کپ میں 48 ٹیمیں شرکت کریں گی، جس کے باعث ایونٹ کا دائرہ کار پہلے سے کہیں زیادہ وسیع ہو گیا ہے۔ ٹورنامنٹ میں ریکارڈ 1248 کھلاڑی اپنی صلاحیتوں کا مظاہرہ کریں گے۔
فٹبال کا یہ میگا ایونٹ 11 جون سے شروع ہو کر 19 جولائی 2026 تک جاری رہے گا۔ امریکا، کینیڈا اور میکسیکو مشترکہ طور پر اس عالمی مقابلے کی میزبانی کر رہے ہیں، جو فٹبال کی تاریخ کا سب سے بڑا ورلڈ کپ تصور کیا جا رہا ہے۔
