گلگت بلتستان انتخابات پر گفتگو کرتے ہوئے مرکزی ترجمان پاکستان پیپلز پارٹی پارلیمنٹرینز شازیہ مری کا کہنا تھا کہ انتخابی میدان میں شکست کے خوف نے مخالفین کو پری پول رگنگ پر مجبور کر دیا ہے۔
شازیہ مری نے کہا کہ گلگت بلتستان میں چیئرمین بلاول بھٹو زرداری کی بڑھتی ہوئی مقبولیت نے سیاسی مخالفین کی نیندیں حرام کر دی ہیں، مختلف حلقوں سے انتخابی عمل میں مداخلت اور بے ضابطگیوں کی شکایات موصول ہو رہی ہیں۔
ترجمان پیپلز پارٹی پارلیمنٹرینز نے کہا کہ کہیں انتظامی افسران کے تبادلے کیے جا رہے ہیں اور کہیں ووٹر لسٹوں میں ردوبدل کی اطلاعات ہیں، انتخابی عمل کو متنازعہ بنانے کی کوششیں جمہوری اقدار کے خلاف ہیں۔
شازیہ مری نے کہا کہ سرکاری مشینری کے ذریعے انتخابی نتائج پر اثرانداز ہونے کی اطلاعات تشویشناک ہیں، شازیہ مر
گلگت بلتستان کے عوام کے مینڈیٹ کا ہر قیمت پر تحفظ یقینی بنایا جانا چاہیے، وفاقی وزراء کی انتخابی مہم میں سرگرم شرکت انتخابی عمل کی شفافیت پر سوالیہ نشان ہے۔
ترجمان پیپلز پارٹی پارلیمنٹرینز نے کہا کہ چیف الیکشن کمشنر بتائیں انتخابی عمل کو غیر جانبدار بنانے کے لیے اب تک کیا اقدامات کیے گئے ہیں، آئین کے آرٹیکل 218 کے تحت شفاف، منصفانہ اور ایماندارانہ انتخابات کرانا الیکشن کمیشن کی ذمہ داری ہے۔
انہوں نے کہا کہ انتخابات کے دوران گلگت بلتستان میں پنجاب پولیس کی موجودگی کئی سوالات کو جنم دے رہی ہے، سرکاری مشینری کے استعمال کی ہر شکایت کا فوری نوٹس لیا جانا چاہئے۔
شازیہ مری کا کہنا تھا کہ عوام کی رائے پر اثرانداز ہونے کی کسی بھی کوشش کو قبول نہیں کیا جائے گا، گلگت بلتستان کے عوام اپنے ووٹ کی طاقت سے جمہوری قوتوں کا ساتھ دیں گے۔
ترجمان پیپلز پارٹی پارلیمنٹرینز نے کہا کہ الیکشن کمیشن تمام سیاسی جماعتوں کو یکساں مواقع فراہم کرنے کے لیے فوری اقدامات کرے، عوامی مینڈیٹ پر کسی قسم کا ڈاکہ جمہوری اقدار کے خلاف ہوگا۔
