امریکی فوج نے دعویٰ کیا ہے کہ اس نے ایران کے جزیرہ کھرگ کی طرف جانے والے ایک آئل ٹینکر کو فضائی حملے میں ناکارہ بنا دیا ہے۔
امریکی سینٹرل کمانڈ (CENTCOM) کے بیان کے مطابق بوٹسوانا کے جھنڈے والے بغیر لدے تیل بردار جہاز M/T Lexie کو اس وقت نشانہ بنایا گیا جب اس نے بارہا وارننگز کے باوجود امریکی افواج کی ہدایات پر عمل نہیں کیا۔
بیان میں کہا گیا کہ جہاز کے عملے نے 24 گھنٹے کے دوران متعدد بار دی گئی ہدایات کو نظر انداز کیا، جس کے بعد ایک امریکی جنگی طیارے نے جہاز کے انجن روم پر ہیل فائر میزائل فائر کیا، جس سے ٹینکر ناکارہ ہو گیا اور اسے ایران کی بندرگاہ تک پہنچنے سے روک دیا گیا۔
CENTCOM کا مزید کہنا ہے کہ اپریل میں ایران کی بندرگاہوں کی ناکہ بندی کے آغاز کے بعد سے یہ چھٹا جہاز ہے جسے اس نوعیت کی کارروائی کے ذریعے غیر فعال کیا گیا ہے۔
دوسری جانب ایرانی میڈیا نے آبنائے ہرمز کے قریب جزیرہ قشم کے علاقے میں دھماکوں کی آوازیں سننے کی اطلاع دی ہے۔ مہر خبررساں ایجنسی کے مطابق مقامی ذرائع اور رہائشیوں نے بتایا کہ علاقے میں اچانک دھماکوں کے بعد کشیدگی میں اضافہ دیکھا گیا ہے۔
