دورے کے دوران پاکستانی سفیر نے یاسنایا پولیانا میوزیم اسٹیٹ کی ڈائریکٹر ایکاترینا ٹالسٹایا اور ریسرچ ڈائریکٹر گالینا الیکسیوا سے ملاقات کی۔
ملاقات میں پاکستان اور یاسنایا پولیانا میوزیم اسٹیٹ کے درمیان ادبی تحقیق، تراجم کے منصوبوں اور تعلیمی تبادلوں کے شعبوں میں تعاون بڑھانے کے امکانات پر تفصیلی گفتگو کی گئی، دونوں فریقوں نے اس بات پر زور دیا کہ ادبی اور علمی روابط کو مزید فروغ دے کر دونوں ممالک کے درمیان ثقافتی تعلقات کو مضبوط بنایا جا سکتا ہے۔
اس موقع پر پاکستانی محققین اور ماہرین تعلیم کی یاسنایا پولیانا کے علمی اور ثقافتی پروگراموں میں زیادہ سے زیادہ شمولیت کے امکانات کا بھی جائزہ لیا گیا۔
دورے کے دوران سفیر فیصل نیاز ترمذی نے لیو ٹالسٹائی کی تاریخی رہائش گاہ کا معائنہ کیا اور دنیا کے عظیم ترین ادیبوں میں شمار ہونے والی اس شخصیت کی زندگی اور ادبی خدمات کے بارے میں تفصیلی معلومات حاصل کیں۔
پاکستانی سفیر نے لیو ٹالسٹائی کی آخری آرام گاہ پر حاضری بھی دی اور عظیم روسی ادیب کو خراجِ عقیدت پیش کیا۔
اس موقع پر دونوں جانب سے اس عزم کا اظہار کیا گیا کہ پاکستان اور روس کے درمیان ادب، تحقیق، تعلیم اور عوامی روابط کے ذریعے باہمی تعاون کو مزید فروغ دیا جائے گا تاکہ دونوں ممالک کے عوام ایک دوسرے کی ثقافت اور علمی ورثے سے زیادہ بہتر طور پر آگاہ ہو سکیں۔
مبصرین کے مطابق یہ دورہ پاکستان اور روس کے درمیان ثقافتی سفارت کاری، ادبی روابط اور علمی تعاون کو مزید مستحکم بنانے کی جانب ایک اہم پیش رفت ہے۔
