پاکستانی شوٹر گلفام جوزف نے رائفل شوٹنگ ورلڈ کپ میں شاندار کارکردگی کا مظاہرہ کرتے ہوئے 10 میٹر ایئر پسٹل ایونٹ کے فائنل راؤنڈ کے لیے کوالیفائی کرلیا، جبکہ ایشین گیمز کے لیے مقامی کوالیفائنگ معیار بھی حاصل کرلیا۔
کوالیفائنگ راؤنڈ میں دنیا بھر سے 142 شوٹرز نے شرکت کی، جہاں گلفام جوزف نے مسلسل بہترین اسکور کرتے ہوئے ٹاپ 8 میں جگہ بنائی اور فائنل راؤنڈ تک رسائی حاصل کی۔
گلفام جوزف نے پہلی سیریز میں 96، دوسری میں 97، تیسری میں 99 پوائنٹس حاصل کیے۔ چوتھی سیریز میں انہوں نے 98، پانچویں میں 97 جبکہ چھٹی سیریز میں 96 پوائنٹس اسکور کیے۔
انہوں نے مجموعی طور پر 583 پوائنٹس حاصل کیے، جس کے ساتھ وہ نہ صرف فائنل میں پہنچنے میں کامیاب رہے بلکہ ایشین گیمز کے لیے مقررہ مقامی معیار بھی مکمل کرلیا۔
پاکستانی شوٹنگ حلقوں نے گلفام جوزف کی کارکردگی کو ملک کے لیے اہم کامیابی قرار دیتے ہوئے امید ظاہر کی ہے کہ وہ فائنل مرحلے میں بھی عمدہ کارکردگی دکھائیں گے۔
