ایران قومی فٹ بال ٹیم کو فیفا ورلڈ کپ 2026 میں شرکت کے لیے امریکی ویزوں کی یقین دہانی کرا دی گئی ہے، جس کے بعد ٹیم کی ٹورنامنٹ میں شرکت سے متعلق خدشات میں کمی آگئی ہے۔
ایرانی حکام کے مطابق جیانی انفانٹینو نے یقین دہانی کرائی ہے کہ تمام ایرانی کھلاڑیوں اور آفیشلز کو امریکہ میں داخلے کے ویزے جاری کیے جائیں گے۔ خطے میں جاری کشیدگی اور سیاسی صورتحال کے باعث ایرانی ٹیم کی شرکت پر سوالات اٹھ رہے تھے۔
احمد دنیا مالی نے کہا کہ ورلڈکپ کے میزبان ممالک کی ذمہ داری ہے کہ وہ تمام شریک ٹیموں کو ویزے فراہم کریں۔ انہوں نے امید ظاہر کی کہ ایرانی اسکواڈ ایک پرسکون ماحول میں ٹورنامنٹ میں حصہ لے گا۔
رپورٹس کے مطابق ایرانی ٹیم اب امریکہ میں قیام کرنے کے بجائے تیخوانا میں اپنا بیس قائم کرے گی تاکہ ویزا اور سفری پیچیدگیوں سے بچا جا سکے۔ کلاڈیا شین بام نے بھی تصدیق کی ہے کہ میکسیکو ایرانی ٹیم کو قیام کی سہولت فراہم کرے گا۔
اس وقت ایرانی اسکواڈ انطالیہ میں تربیتی کیمپ میں موجود ہے، جبکہ بعض کھلاڑیوں نے انقرہ میں امریکی ویزوں کے لیے درخواستیں بھی جمع کرا دی ہیں۔
