سیکرٹری و چیئرمین ریلویز سید مظہر علی شاہ نے نئی ٹرین سروس کا افتتاح پشاور کینٹ ریلوے سٹیشن میں کیا، افتتاحی تقریب میں سابق کرکٹر شاہد آفریدی نے بھی شرکت کی۔
جدید سہولیات سے لیس عوام ایکسپریس میں 8 ایئر کنڈیشنڈ بوگیاں، آرام دہ سیٹوں سمیت دیگر سہولیات موجود ہیں جس میں 1234 مسافر سفر کرسکیں گے۔
اپ گریڈ کی گئی عوام ایکسپریس کی پہلی ٹرین ساڑھے 8 بجے پشاور سے کراچی کیلئے روانہ ہوئی جو پشاور سے براستہ راولپنڈی، لاہور، خانیوال، ملتان، بہاولپور، خان پور، لیاقت پور، رحیم یار خان، صادق اباد، ڈہرکی، پنوں عاقل، روہڑی، نواب شاہ، ٹنڈو آدم، حیرد آباد سے ہوتے ہوئے کراچی پہنچے گی۔
سیکرٹری و چیئرمین پاکستان ریلویز سید مظہر علی شاہ نے عوام ایکسپریس کی افتتاحی تقریب سے خطاب کرتے ہوئے کہا کہ ٹرین میں مسافروں کو جدید سہولیات بھی فراہم کی جا رہی ہے، جدید ٹرین میں سفر کرنے والوں کو خوش آمدید کہتے ہیں۔
ان کا کہنا تھا کہ کوئٹہ حادثہ سے ہمارے حوصلے پست نہیں ہو سکتے، پاکستان ریلوے قومی یک جہتی کی علامت ہے، ریلوے سروسز کو مزید بہتر کریں گے، ہماری ریلوے سروسز کا پہیہ کبھی نہ رکے گا، ریلوے کی نئی سروسز اور بزنس دونوں مزید مضبوط ہو رہے ہیں۔
سابق قومی کرکٹر شاہد آفریدی نے تقریب سے خطاب میں کہا کہ کوئٹہ کے واقعے پر افسوس ہوا، اللہ پاک شہداء کے درجات بلند فرمائے، پاکستان ریلوے کو نئی ٹرین کے آغاز پر مبارکباد دیتا ہوں، کینٹ سٹیشن پر شاہد آفریدی فاؤنڈیشن کی جانب سے واٹر فلٹریشن پلانٹ لگایا گیا ہے۔
