امریکی صدر Donald Trump نے اپنے سماجی رابطے کے پلیٹ فارم ٹروتھ سوشل پر امریکی پرچم سے مزین ایران کا ایک نقشہ شیئر کر دیا، جس کے بعد سوشل میڈیا پر نئی بحث شروع ہو گئی ہے۔
ڈونلڈ ٹرمپ کی جانب سے شیئر کی گئی تصویر میں ایران کے نقشے پر امریکی پرچم نمایاں کیا گیا ہے جبکہ اس پر “یونائیٹڈ اسٹیٹس آف مڈل ایسٹ” تحریر تھا۔ تصویر کے ساتھ سوالیہ نشان بھی درج کیا گیا، جسے صارفین نے مختلف زاویوں سے تعبیر کرنا شروع کر دیا ہے۔
یہ پوسٹ ایسے وقت سامنے آئی ہے جب ایران اور امریکا کے درمیان جاری مذاکرات میں ممکنہ پیشرفت کی خبریں گردش کر رہی ہیں اور مختلف عالمی ذرائع دونوں ممالک کے درمیان سفارتی رابطوں میں تیزی کا دعویٰ کر رہے ہیں۔
سیاسی مبصرین کے مطابق ٹرمپ کی اس پوسٹ کو مشرقِ وسطیٰ سے متعلق ان کی ممکنہ حکمتِ عملی یا سیاسی پیغام کے طور پر بھی دیکھا جا رہا ہے، تاہم امریکی صدر کی جانب سے اس حوالے سے کوئی وضاحت سامنے نہیں آئی۔
دوسری جانب سوشل میڈیا صارفین نے اس تصویر پر شدید ردعمل دیا ہے۔ بعض صارفین نے اسے طنزیہ سیاسی پیغام قرار دیا جبکہ کچھ حلقوں نے اسے اشتعال انگیز اقدام بھی کہا۔
