حکام کے مطابق ڈیرہ غازی خان میں کلثوم نواز کینسر ہسپتال قائم کیا جائے گا، جس پر مجموعی طور پر 15 ارب 21 کروڑ 26 لاکھ روپے لاگت آنے کا تخمینہ لگایا گیا ہے۔
ذرائع کے مطابق مجوزہ ہسپتال کا نام سابق خاتون اول کلثوم کے نام پر رکھنے کی تجویز دی گئی ہے، یہ منصوبہ 2026 سے 2029 تک مکمل کرنے کی تجویز سامنے آئی ہے، جبکہ پنجاب حکومت آئندہ مالی سال کے بجٹ میں اس منصوبے کیلئے فنڈز مختص کرنے کی تیاری کر رہی ہے۔
خواجہ سلمان رفیق نے کہا ہے کہ جنوبی پنجاب کے ضلع ڈی جی خان میں جدید کینسر ہسپتال تعمیر کیا جائے گا تاکہ خطے کے مریضوں کو علاج کیلئے بڑے شہروں کا رخ نہ کرنا پڑے۔
انہوں نے بتایا کہ ہسپتال کیلئے آئندہ مالی سال کے بجٹ میں فنڈز رکھے جا رہے ہیں اور حکومت کینسر کے علاج کے شعبے میں اربوں روپے کے نئے منصوبے شروع کرنے جا رہی ہے۔
واضح رہے کہ اس سے قبل لاہور میں نواز شریف کینسر ہسپتال 74 ارب 92 کروڑ روپے کی لاگت سے زیر تعمیر ہے، جبکہ ڈی جی خان میں منصوبہ بندی کیے جانے والا ہسپتال جنوبی پنجاب کا دوسرا بڑا کینسر ہسپتال ہوگا۔
