ملکی معیشت کہاں کھڑی ہے؟ بڑے مالیاتی اداروں نے معاشی خاکہ جاری کر دیا

سٹیٹ بینک، پاکستان سٹاک ایکسچینج، ایف بی آر، نیپرا، ادارہ شماریات کے اعداد و شمار نے معاشی سمت واضح کر دی۔

اعداد و شمار کے مطابق ملکی زرمبادلہ، صنعتی سرگرمیاں، سیمنٹ اور آٹو سیکٹر مضبوط، حکومتی قرضے اور مہنگائی میں اضافہ ہوا، کرنٹ اکاؤنٹ، برآمدات اور غیر ملکی سرمایہ کاری کی کمی سے معاشی تشویش بڑھ گئی۔

ملکی آٹو سیکٹر میں بہتری، گاڑیوں کی سالانہ فروخت 106.9 فیصد، ٹریکٹرز کی فروخت 76.3 فیصد بڑھ گئی۔ آٹو فنانسنگ کا حجم 36.6 فیصد بڑھ کر 360 ارب روپے پر پہنچ گیا۔

رپورٹ کے مطابق ملک بھر میں کھاد کی فروخت بڑھ گئی، زرعی طلب سے سالانہ کھاد کی فروخت 84.7 فیصد رہی، پٹرولیم قیمتوں میں اضافے سے مہنگائی کی شرح بڑھ کر 11.1 فیصد پر پہنچ گئی۔

اعداد و شمار کے مطابق درآمدات بڑھنے سے کرنٹ اکاؤنٹ بیلنس مثبت سے منفی زون میں داخل ہوگیا، کرنٹ اکاؤنٹ خسارہ 32 کروڑ 40 لاکھ ڈالر رہا، درآمدی بل بڑھ کر تقریباً 7 ارب ڈالر پر پہنچ گیا۔

رپورٹ کے مطابق خالص بیرونی سرمایہ کاری 69.5 فیصد کمی کا شکار ہونے سے حجم 5 کروڑ 45 لاکھ ڈالر پر آگیا۔

سٹاک مارکیٹ کی شاندار کارکردگی، 100انڈیکس ماہانہ 9.6 فیصد اور سالانہ 46.4 فیصد بڑھ گیا، تعمیراتی شعبے کی ترقی سے سیمنٹ کی فروخت 11.1 فیصد بڑھ کر 39 لاکھ ٹن پر پہنچ گئی۔

رپورٹ کے مطابق بڑی صنعتوں کی ترقی کا انڈیکس ایک سال میں 11.1 فیصد بڑھ کر 124.9 پر آگیا، حکومتی قرضے ایک سال میں خطرناک حد سے تجاوز کرکے 80 ہزار ارب روپے سے بڑھ گئے۔

سٹیٹ بینک ذخائر ایک سال میں 55.2 فیصد بڑھ کر 15 ارب ڈالر سے تجاوز کرگئے، پٹرولیم مصنوعات میں ڈیزل کی فروخت سالانہ 11.6 فیصد اور پٹرول 6.9 فیصد کم رہی۔

رپورٹ کے مطابق ملکی سطح پر بجلی کی پیداوار طلب میں کمی سے ایک سال میں 9.7 فیصد کم رہی، ملکی ترسیلات زر 10.5 فیصد بڑھی اور روپیہ امریکی ڈالر کےمقابلے میں 0.8 فیصد معمولی بہتر ہوا۔

اعداد و شمار کے مطابق پرائیوٹ سیکٹر کو تجارتی سرگرمیوں کیلئے قرضے ایک سال میں 11.8 فیصد بڑھ کر 106 کھرب روپے رہے۔