پاکستان قومی کرکٹ ٹیم کے کھلاڑی پاک آسٹریلیا ون ڈے سیریز کی تیاریوں کے سلسلے میں نیشنل کرکٹ اکیڈمی (این سی اے) وائٹ بال کیمپ کے بعد آج اسلام آباد روانہ ہوں گے، جہاں قومی ٹیم سیریز سے قبل اپنی تیاریاں مزید تیز کرے گی۔
ذرائع کے مطابق قومی کرکٹرز کل راولپنڈی کرکٹ اسٹیڈیم میں ٹریننگ سیشن میں حصہ لیں گے، جبکہ آسٹریلیا کرکٹ ٹیم 23 مئی کو اسلام آباد پہنچے گی۔
ذرائع کا کہنا ہے کہ آسٹریلیا کے خلاف ون ڈے سیریز کے لیے قومی اسکواڈ کا اعلان آئندہ دو سے تین روز میں متوقع ہے۔ قومی ٹیم کے ون ڈے کپتان شاہین شاہ آفریدی کی بنگلادیش سے وطن واپسی کے بعد اسکواڈ کے حوالے سے اہم مشاورت بھی کی جائے گی۔
واضح رہے کہ پاکستان اور آسٹریلیا کے درمیان تین میچوں پر مشتمل ون ڈے سیریز کا پہلا میچ 30 مئی کو راولپنڈی میں کھیلا جائے گا، جبکہ دوسرا اور تیسرا ون ڈے میچ 2 اور 4 جون کو قذافی اسٹیڈیم لاہور میں شیڈول ہیں۔
