پاکستان کی ثالثی کے ذریعے ایران نے امریکا کو ایک نئی امن تجویز ارسال کر دی ہے، جس میں خطے میں کشیدگی کم کرنے اور جنگ بندی کو مستحکم بنانے کے نکات شامل کیے گئے ہیں۔
ذرائع کے مطابق پاکستان نے بطور ثالث یہ تازہ تجویز واشنگٹن کے ساتھ شیئر کی ہے، تاہم فریقین کے درمیان اختلافات اب بھی برقرار ہیں اور پیشرفت کو مشکل قرار دیا جا رہا ہے۔
اسماعیل بقائی نے تصدیق کی ہے کہ تہران کے خیالات پاکستانی چینل کے ذریعے امریکی فریق تک پہنچائے گئے ہیں، تاہم انہوں نے اس کی تفصیلات بتانے سے گریز کیا۔
رپورٹس کے مطابق اس نئی تجویز میں فوری طور پر جنگ بندی، سمندری راستوں خصوصاً آبنائے ہرمز کی بحالی اور بعض پابندیوں میں نرمی جیسے نکات شامل ہیں۔ ایران کا مؤقف ہے کہ پہلے مرحلے میں کشیدگی کم کی جائے اور حساس معاملات کو بعد کے مذاکرات تک مؤخر کیا جائے۔
دوسری جانب پاکستانی ذرائع کے مطابق دونوں فریقین مسلسل اپنے مطالبات میں تبدیلی کر رہے ہیں، جس کے باعث مذاکراتی عمل سست روی کا شکار ہے۔ ذرائع نے یہ بھی کہا کہ خطے میں صورتحال نازک ہے اور مزید تاخیر سے کشیدگی بڑھنے کا خدشہ ہے۔
امریکی حکام کی جانب سے فوری طور پر کوئی باضابطہ ردعمل سامنے نہیں آیا، تاہم قبل ازیں واشنگٹن ایران سے اپنے جوہری پروگرام پر سخت مؤقف رکھتا رہا ہے۔
