واہ کینٹ میں 55ویں نیشنل مینز والی بال چیمپئن شپ کا شاندار آغاز، واپڈا، آرمی، ایئر فورس اور نیوی کامیاب

واہ کینٹ میں 55ویں نیشنل مینز والی بال چیمپئن شپ کا رنگا رنگ آغاز ہوگیا، جس میں ملک بھر سے 16 ٹیمیں ٹائٹل کے حصول کے لیے میدان میں اتر آئی ہیں۔ پاکستان والی بال فیڈریشن کے زیر اہتمام یہ قومی سطح کے مقابلے پی او ایف اسپورٹس کمپلیکس واہ کینٹ میں جاری ہیں۔

چیمپئن شپ کے افتتاحی روز سنسنی خیز مقابلے دیکھنے میں آئے جہاں واپڈا، آرمی، ایئر فورس اور پاکستان نیوی نے اپنے اپنے میچز میں کامیابی حاصل کرتے ہوئے ایونٹ کا فاتحانہ آغاز کیا۔

افتتاحی میچ میں واپڈا نے ایئرپورٹس سیکیورٹی فورس (اے ایس ایف) کو سخت مقابلے کے بعد 0-3 سے شکست دی۔ میچ کے سیٹس کا اسکور 23-25، 17-25 اور 21-25 رہا۔ دونوں ٹیموں کے درمیان دلچسپ مقابلہ دیکھنے کو ملا تاہم واپڈا نے تجربے کی بنیاد پر کامیابی اپنے نام کرلی۔

دوسرے میچ میں پاکستان آرمی نے ہائر ایجوکیشن کمیشن (ایچ ای سی) کے خلاف شاندار کھیل پیش کرتے ہوئے میچ 0-3 سے جیت لیا۔ آرمی کی ٹیم نے ابتدا سے ہی میچ پر گرفت مضبوط رکھی اور 16-25، 23-25 اور 20-25 کے اسکور کے ساتھ کامیابی حاصل کی۔

پاکستان ایئر فورس نے آزاد جموں و کشمیر (اے جے کے) کے خلاف یکطرفہ مقابلے میں عمدہ کارکردگی دکھائی اور 0-3 سے واضح برتری کے ساتھ فتح سمیٹی۔ اسی طرح پاکستان نیوی نے گلگت بلتستان کی ٹیم کو بھی 0-3 سے شکست دے کر اپنی مہم کا کامیاب آغاز کیا۔

چیمپئن شپ میں شرکت کرنے والی ٹیموں میں ملک کے مختلف اداروں اور صوبائی یونٹس کی نمایاں ٹیمیں شامل ہیں جبکہ ٹورنامنٹ کے دوران قومی سطح کے بہترین کھلاڑی اپنی صلاحیتوں کے جوہر دکھا رہے ہیں۔