وزیراعلیٰ پنجاب مریم نوازشریف نے آذربائیجان میں ورلڈ اربن فورم میں شرکت پر خوشی کا اظہار کرتے ہوئے کہا کہ پاکستان کی قیادت اور عوام کی طرف سے محبت کا پیغام لائی ہوں،بھرپور مہمان نوازی پرآذربائیجان کی قیادت کی مشکورہوں۔
تفصیلات کے مطابق مریم نوازشریف کا کہناتھا کہ صدرالہام علیوف کی قیادت میں آذربائیجان کی ترقی قابل تحسین ہے،آذربائیجان کے بانی صدرحیدر علیوف پاکستان کے سچے دوست تھے،پنجاب میں چیلنجز پرقابو پاتے ہوئے آگے بڑھ رہے ہیں،شہر صرف سڑکیں نہیں،انسانوں کی ترقی سے منسلک ہوتے ہیں،سماجی اور معاشی اعداد و شمار کیلئے پنجاب اکنامک رجسٹری سروے شروع کیا گیا۔
مریم نواز کا کہناتھا کہ ہاؤسنگ کے شعبے میں اپنی چھت اپنا گھر کا انقلابی منصوبہ شروع کیا گیا،پنجاب میں 2 ہزار دیہاتوں کو جدید سہولیات سےآراستہ کر رہے ہیں، دیہی علاقوں کی ترقی مساوی سہولیات کی فراہمی کیلئے اہم ہے، روابط میں اضافے کیلئے شاہراہوں اور بنیادی ڈھانچے کو ترقی دے رہے ہیں،موسمیاتی تبدیلیوں کے چیلنجز کو مد نظر رکھتے ہوئے انفرا اسٹرکچر کو ترقی دے رہے ہیں۔
