کویت میں سپریم کمیٹی برائے شہریت امور نے 31 افراد کی کویتی شہریت منسوخ کرنے کا فیصلہ کر لیا ہے۔ یہ کارروائی دوہری شہریت رکھنے کے الزام میں کی گئی۔
غیر ملکی میڈیا رپورٹس کے مطابق کمیٹی نے یہ اقدام کویتی قانونِ شہریت کی دفعہ 11 کے تحت اٹھایا، جس کے مطابق اگر کوئی شہری حکومتی اجازت کے بغیر کسی دوسرے ملک کی شہریت حاصل کرے یا برقرار رکھے تو اس کی کویتی شہریت واپس لی جا سکتی ہے۔
کمیٹی کے حالیہ اجلاس میں مختلف شہریت فائلوں اور قوانین کی خلاف ورزی سے متعلق کیسز کا تفصیلی جائزہ لیا گیا، جس کے بعد 31 افراد کی شہریت منسوخ کرنے کی منظوری دی گئی۔
ذرائع کے مطابق فیصلے کو سرکاری گزٹ میں شائع کرنے سے قبل متعلقہ کیسز کو مزید قانونی اور انتظامی کارروائی کے لیے متعلقہ اداروں کے سپرد کر دیا گیا ہے۔
