سلہٹ میں جاری پاکستان اور بنگلہ دیش کے درمیان دوسرے اور آخری ٹیسٹ میچ میں پاکستان نے ٹاس جیت کر پہلے فیلڈنگ کرنے کا فیصلہ کیا ہے۔ دو ٹیسٹ میچوں کی سیریز میں بنگلہ دیش کو ایک صفر کی برتری حاصل ہے، اس لیے قومی ٹیم کے لیے یہ مقابلہ نہایت اہمیت اختیار کر گیا ہے۔
پہلے ٹیسٹ میں بنگلہ دیش نے شاندار کارکردگی کا مظاہرہ کرتے ہوئے پاکستان کو 104 رنز سے شکست دی تھی۔ 268 رنز کے ہدف کے تعاقب میں پاکستانی بیٹنگ لائن دباؤ کا شکار رہی اور پوری ٹیم دوسری اننگز میں صرف 163 رنز پر ڈھیر ہوگئی تھی۔
دوسرے ٹیسٹ کے لیے قومی ٹیم میں اہم تبدیلیاں کی گئی ہیں۔ سابق کپتان بابر اعظم کی ٹیم میں واپسی ہوئی ہے جبکہ فاسٹ بولر خرم شہزاد اور اسپنر ساجد خان کو بھی پلیئنگ الیون میں شامل کیا گیا ہے۔ دوسری جانب امام الحق، شاہین شاہ آفریدی اور نعمان علی کو اس میچ کے لیے ٹیم سے باہر رکھا گیا ہے۔
پاکستانی ٹیم مینجمنٹ کو امید ہے کہ نئی کمبی نیشن کے ساتھ ٹیم بہتر کارکردگی دکھاتے ہوئے سیریز برابر کرنے میں کامیاب ہوگی، جبکہ میزبان بنگلہ دیش اپنی تاریخی برتری کو برقرار رکھتے ہوئے سیریز جیتنے کے لیے پرعزم ہے۔
سلہٹ ٹیسٹ میں دونوں ٹیموں کے درمیان سخت مقابلے کی توقع کی جا رہی ہے، خاص طور پر پاکستانی بولنگ اٹیک پر نظریں مرکوز ہیں جسے ابتدا میں ہی بنگلہ دیشی بیٹرز کو دباؤ میں لانا ہوگا۔
