چین کی وزارت خارجہ نے کہا ہے کہ بیجنگ روس کے ساتھ مل کر ایک زیادہ منصفانہ اور متوازن عالمی نظام کی تشکیل کے لیے تعاون جاری رکھنا چاہتا ہے، جبکہ دونوں ممالک کے اسٹریٹجک تعلقات عالمی استحکام کا اہم ستون بن چکے ہیں۔
چینی سرکاری میڈیا کے مطابق وزارت خارجہ کے ترجمان گوجیاکھون نے یومیہ پریس بریفنگ کے دوران کہا کہ حالیہ برسوں میں چینی صدر Xi Jinping اور روسی صدر Vladimir Putin کی قیادت میں چین اور روس کے تعلقات مسلسل مضبوط ہوئے ہیں۔
ترجمان نے کہا کہ موجودہ غیر یقینی عالمی صورتحال میں چین اور روس کا تعاون دنیا کو استحکام فراہم کر رہا ہے اور دونوں ممالک مختلف شعبوں میں تعاون کو مزید وسعت دینے کے خواہاں ہیں۔
انہوں نے اس بات پر زور دیا کہ چین ہمیشہ خوشگوار ہمسائیگی، جامع اسٹریٹجک تعاون اور باہمی مفاد کی پالیسی پر کاربند رہے گا۔ ان کے مطابق بیجنگ اور ماسکو عالمی حکمرانی کے زیادہ منصفانہ اور معقول نظام کے قیام کے لیے مشترکہ کوششیں جاری رکھیں گے۔
یہ بیان ایسے وقت سامنے آیا ہے جب روسی صدر ولادیمیر پیوٹن نے حالیہ دنوں کہا تھا کہ روس اور چین کے درمیان اسٹریٹجک تعاون عالمی استحکام کے اہم ستون میں تبدیل ہو چکا ہے۔
سیاسی مبصرین کے مطابق چین اور روس کے درمیان بڑھتا ہوا تعاون عالمی طاقتوں کے توازن، معاشی شراکت داری، توانائی، دفاع اور سفارتی امور میں اہم پیش رفت تصور کیا جا رہا ہے، جبکہ مغربی ممالک اس شراکت داری کو عالمی سیاست میں ایک نئے بلاک کے طور پر دیکھ رہے ہیں۔
