بھارتی ریاست اترپردیش میں ایک مدرسے میں نصب پنکھے پر مبینہ طور پر ’’میڈ اِن پاکستان‘‘ کا لیبل دیکھنے کے بعد پولیس نے دو افراد کو حراست میں لے لیا، تاہم تحقیقات مکمل ہونے پر انہیں رہا کر دیا گیا۔
بھارتی میڈیا رپورٹس کے مطابق معاملہ اُس وقت سامنے آیا جب سوشل میڈیا پر ایک پنکھے کی تصویر تیزی سے وائرل ہوئی، جس میں دعویٰ کیا گیا تھا کہ مدرسے میں استعمال ہونے والا پنکھا پاکستان میں تیار کیا گیا ہے۔ تصویر کے پھیلنے کے بعد بعض حلقوں کی جانب سے تحقیقات کا مطالبہ کیا گیا۔
مقامی پولیس حکام کے مطابق ابتدائی انکوائری میں مدرسے کے منتظم سمیت دو افراد کو پوچھ گچھ کے لیے حراست میں لیا گیا۔ بعد ازاں تفتیش کے دوران معلوم ہوا کہ مذکورہ پنکھا سعودی عرب سے خریدا گیا تھا۔
وشن پورہ تھانے کے افسر ونے مشرا کے مطابق حکام نے تمام پہلوؤں کا تفصیلی جائزہ لیا اور خریداری سے متعلق دستاویزات بھی چیک کیں۔ دستاویزات کی تصدیق کے بعد کوئی مشکوک بات سامنے نہیں آئی۔
پولیس کا کہنا ہے کہ مکمل تحقیقات کے بعد دونوں افراد کو رہا کر دیا گیا اور معاملہ ختم کر دیا گیا۔
