تھائی لینڈ کے سابق وزیرِاعظم تھاکسن شناوترا کو آٹھ ماہ قید کاٹنے کے بعد پیرول پر رہا کر دیا گیا، جہاں جیل سے باہر آتے ہی ان کے حامیوں نے پرتپاک استقبال کیا۔
رپورٹس کے مطابق 76 سالہ ارب پتی سیاستدان پیر کے روز کلونگ پریم جیل سے رہا ہوئے۔
رہائی کے موقع پر ان کی صاحبزادی اور سیاسی جانشین پیٹونگٹرن شناوترا سمیت خاندان کے دیگر افراد بھی موجود تھے۔
جیل سے باہر آنے پر سرخ لباس پہنے سینکڑوں حامیوں نے “وی لوو تھاکسن” کے نعرے لگائے جبکہ تھاکسن شناوترا نے ہاتھ ہلا کر اپنے جذبات کا اظہار کیا اور کہا کہ وہ دوبارہ آزادی حاصل کر کے مطمئن ہیں۔
تھاکسن شناوترا گزشتہ برس عدالت کی جانب سے سزا سنائے جانے کے بعد قید میں تھے۔ اس سے قبل وہ کئی برس بیرونِ ملک خود ساختہ جلاوطنی میں گزار چکے ہیں۔
