متحدہ عرب امارات نے ایران کی جانب سے میزائل اور ڈرون حملوں پر شدید ردعمل دیتے ہوئے انہیں “خطرناک اشتعال انگیزی” قرار دیا ہے اور واضح کیا ہے کہ اپنی خودمختاری کے دفاع کے لیے بھرپور جواب دینے کا حق محفوظ رکھتا ہے۔
اماراتی وزارتِ خارجہ کے بیان میں کہا گیا کہ یہ حملے نہ صرف ناقابلِ قبول ہیں بلکہ بین الاقوامی قانون اور اقوامِ متحدہ کے منشور کی کھلی خلاف ورزی بھی ہیں۔ بیان کے مطابق ملک کے دفاعی نظام نے ایران کی جانب سے داغے گئے 15 میزائلوں اور ڈرونز کو فضا میں ہی ناکارہ بنا دیا، جبکہ ایک ڈرون سمندر میں جا گرا۔
حکام کے مطابق دو ڈرونز صنعتی علاقے فجیرہ میں واقع آئل تنصیب پر آ گرے، جس کے نتیجے میں زور دار دھماکا ہوا اور آگ بھڑک اٹھی۔ اس واقعے میں تین غیر ملکی شہری زخمی ہوئے، جن کا تعلق بھارت سے بتایا گیا ہے۔
دوسری جانب ایرانی سرکاری میڈیا نے ایک سینیئر اہلکار کے حوالے سے دعویٰ کیا ہے کہ ایران کا یو اے ای پر حملہ کرنے کا کوئی ارادہ نہیں تھا، تاہم اس بیان کی مزید تفصیلات یا ذمہ دار شخصیت کا نام ظاہر نہیں کیا گیا۔
