روس نے یوکرین کے ساتھ جاری جنگ کے تناظر میں 8 اور 9 مئی کے دوران یکطرفہ عارضی جنگ بندی کا اعلان کر دیا ہے، جسے ماسکو میں منعقد ہونے والی یومِ فتح کی تقریبات سے جوڑا جا رہا ہے۔
روسی وزارتِ دفاع کے ترجمان کے مطابق یہ فیصلہ صدر ولادیمیر پیوٹن کی ہدایت پر کیا گیا، جس کا مقصد نازی جرمنی کے خلاف فتح کی یاد میں ہونے والی تقریبات کے دوران سیکیورٹی یقینی بنانا ہے۔ حکام نے خبردار کیا ہے کہ اگر اس دوران یوکرین کی جانب سے کسی قسم کی خلل اندازی یا حملہ کیا گیا تو روس سخت اور بڑے پیمانے پر جواب دے گا۔
دوسری جانب یوکرین نے اس عارضی جنگ بندی کو مسترد کر دیا ہے۔ یوکرینی صدر وولودیمیر زیلنسکی کا کہنا ہے کہ ان کا ملک صرف طویل المدتی اور بامعنی جنگ بندی کا حامی ہے، نہ کہ ایسی مختصر مدت کی پیشکش جو محض ماسکو میں فوجی پریڈ کے لیے چند گھنٹوں کا تحفظ فراہم کرے۔
یاد رہے کہ یوم فتح روس میں ہر سال 9 مئی کو منایا جاتا ہے، جو دوسری جنگ عظیم میں نازی جرمنی کی شکست کی یادگار ہے۔ گزشتہ سال بھی روس نے اسی موقع پر تین روزہ جنگ بندی کا اعلان کیا تھا، تاہم یوکرین نے اسے قبول نہیں کیا تھا۔
