پاکستان سپر لیگ 11 کے اہم ایلیمینیٹر ٹو میچ میں اسلام آباد یونائیٹڈ نے حیدرآباد کنگزمین کے خلاف ٹاس جیت کر پہلے فیلڈنگ کا فیصلہ کیا ہے۔
لاہور میں جاری اس ناک آؤٹ مقابلے میں اسلام آباد یونائیٹڈ کے کپتان شاداب خان کا کہنا تھا کہ اس مرحلے پر دباؤ کو بہتر انداز میں سنبھالنے والی ٹیم ہی کامیابی حاصل کرے گی۔ انہوں نے بتایا کہ ٹیم میں کوئی تبدیلی نہیں کی گئی اور پاور پلے میں بہتر کارکردگی پر توجہ دی جا رہی ہے۔
دوسری جانب حیدرآباد کنگزمین کے کپتان مارنس لبوشین نے کہا کہ وہ بھی ٹاس جیت کر پہلے بولنگ کو ترجیح دیتے، تاہم ان کی ٹیم ہر صورتحال کے لیے تیار ہے۔ ان کے مطابق وکٹ بیٹنگ کے لیے سازگار دکھائی دے رہی ہے اور کھلاڑی پُرجوش ہیں۔
واضح رہے کہ اسلام آباد یونائیٹڈ نے گروپ مرحلے میں اچھی کارکردگی دکھائی تھی، تاہم کوالیفائر میں پشاور زلمی کے ہاتھوں شکست کے بعد ٹیم اس میچ میں مرو یا مارو کی صورتحال سے دوچار ہے۔
دوسری جانب حیدرآباد کنگزمین شاندار فارم میں ہے اور ایلیمینیٹر مرحلے میں لاہور قلندرز کو شکست دے کر اپنی مہم کو برقرار رکھے ہوئے ہے، اور اب فائنل تک رسائی کے لیے پُرعزم نظر آتی ہے۔
