فیفا کی 76ویں کانگریس کے دوران ایک اہم موقع پر اس وقت کشیدگی دیکھنے میں آئی جب جبریل رجوب نے اسرائیلی نمائندے کے ساتھ تصویر بنوانے اور ہاتھ ملانے سے انکار کر دیا۔
رپورٹس کے مطابق فلسطینی فٹبال فیڈریشن کے صدر جبریل رجوب نے باسم شیخ سلیمان کے ساتھ اسٹیج پر کھڑے ہونے سے بھی گریز کیا، جس سے تقریب میں ایک غیر معمولی صورتحال پیدا ہو گئی۔
یہ واقعہ اس وقت پیش آیا جب جیانی انفانٹینو نے دونوں عہدیداروں کو اپنے ساتھ آنے کی دعوت دی۔ ذرائع کے مطابق انفانٹینو نے رجوب کو آمادہ کرنے کی کوشش بھی کی، تاہم وہ اپنے مؤقف پر قائم رہے۔
فلسطینی فٹبال ایسوسی ایشن کی نائب صدر سوزن شلبی کے مطابق رجوب نے واضح کیا کہ وہ اسرائیلی نمائندے سے مصافحہ نہیں کر سکتے۔
بعد ازاں جیانی انفانٹینو نے اپنے خطاب میں دونوں فریقین پر زور دیا کہ وہ کھیل کے فروغ کے لیے باہمی تعاون کو ترجیح دیں، تاہم فلسطینی حکام نے اس موقف پر تحفظات کا اظہار کیا۔
یاد رہے کہ فلسطینی فٹبال حکام نے حال ہی میں کھیلوں کی ثالثی عدالت میں اپیل دائر کی ہے، جس میں مغربی کنارے میں قائم اسرائیلی کلبز کے خلاف کارروائی کا مطالبہ کیا گیا ہے۔
