پاکستان،جنوبی کوریا نے تجارت اور سرمایہ کاری کے فروغ پر اتفاق کرلیا۔ کوریا کے وزیر تجارت نے ہم منصب جام کمال خان سے ورچوئل ملاقات میں کہا پاکستان کی جانب سے امن کے قیام کی کوششیں صرف متعلقہ ممالک ہی نہیں بلکہ پوری دنیا کے لیے بہتر ہیں۔
وفاقی وزیرِ تجارت جام کمال خان نے جنوبی کوریا کے وزیرِ تجارت ییو ہان کو کے ساتھ ورچوئل ملاقات کی، دوطرفہ تجارتی تعلقات کے فروغ، جامع اقتصادی شراکت داری معاہدہ (سیپا) پر پیشرفت اور سرمایہ کاری تعاون مضبوط بنانے پر تفصیلی تبادلہ خیال کیا گیا۔
کورین وزیرِ تجارت نے مشرقِ وسطیٰ کی موجودہ صورتحال میں امن کے فروغ کے لیے پاکستان کے کردار کو سراہا ۔ وزیرِ تجارت جام کمال خان نے اظہارِ تشکر کرتے ہوئے امید ظاہر کی کہ جاری کوششیں خطے میں استحکام لائیں گی، جو عالمی تجارت، توانائی منڈیوں اور اقتصادی روابط کے لیے نہایت اہم ہے۔کہا پاکستان وسطی ایشیا اور افریقہ کے لیے اہم تجارتی گیٹ وے بن سکتا ہے۔کورین کمپنیوں کو درپیش مسائل حل کرنے کی یقین دہانی بھی کروائی۔
کورین وزیرِ تجارت نے کہا کہ متعدد کورین کمپنیاں پاکستان میں سرمایہ کاری کی خواہاں ہیں اور اسے ایک محفوظ اور پُرامید منزل سمجھتی ہیں۔ انہوں نے کہا کہ سیپا جیسے فریم ورک سے سرمایہ کاروں کا اعتماد مزید بڑھے گا اور اقتصادی تعاون کو فروغ ملے گا۔
