خشک سالی اور صحرائی پھیلاؤ کے عالمی دن پر صدر مملکت اور وزیراعظم نے قدرتی وسائل کے تحفظ اور چراگاہوں کی بحالی کے عزم کا اعادہ کیا ہے۔دونوں رہنماؤں نے موسمیاتی تبدیلی اور خشک سالی سے نمٹنے کیلئے مشترکہ کوششوں پر زور دیا۔
خشک سالی کے عالمی دن پر اپنے پیغامات میں صدر مملکت آصف علی زرداری اور وزیراعظم شہباز شریف نے قدرتی چراگاہوں، زمینی وسائل اور ماحول کے تحفظ کی اہمیت اجاگر کی ہے۔
صدر مملکت نے کہا کہ چراگاہوں کا تحفظ غذائی سلامتی، ماحولیاتی توازن اور لاکھوں افراد کے روزگار کیلئے ناگزیر ہے جبکہ موسمیاتی تبدیلی اور خشک سالی ان کیلئے سنگین خطرات بن چکے ہیں۔ انہوں نے کہا کہ حکومت خشک سالی کے اثرات کم کرنے اور قدرتی وسائل کے تحفظ کیلئے عملی اقدامات کر رہی ہے۔
وزیراعظم شہباز شریف نے کہا کہ اس سال یہ دن “قدرتی چراگاہیں، پہچانیں، احترام کریں، بحال کریں” کے عنوان سے منایا جا رہا ہے۔ انہوں نے کہا کہ چراگاہیں دیہی معیشت، مویشی بانی اور حیاتیاتی تنوع میں اہم کردار ادا کرتی ہیں۔
وزیراعظم نے زمین کے انحطاط، صحرائی پھیلاؤ اور خشک سالی کے تدارک کیلئے پاکستان کے عزم کا اعادہ کرتے ہوئے کہا کہ حکومت زرعی شعبے کی معاونت اور زمینی وسائل کے تحفظ کیلئے مختلف اقدامات کر رہی ہے۔
