کینیا کے رفٹ ویلی ریجن میں ایک لڑکیوں کے بورڈنگ اسکول میں رات کے وقت لگنے والی آگ کے نتیجے میں 17 طالبات جاں بحق ہو گئی ہیں، جبکہ متعدد زخمی ہیں۔
حکومتی حکام کے مطابق آگ گلگل میں واقع یوتومشی گرلز اکیڈمی کے سینئر اسکول میں آدھی رات کے بعد لگی اور دو گھنٹے سے زائد جاری رہی۔
جولیس میگوس نے صحافیوں کو بتایا کہ آگ لگنے کی اصل وجہ تاحال معلوم نہیں ہو سکی اور اس حوالے سے تحقیقات جاری ہیں۔
رپورٹس کے مطابق حادثے میں 79 طالبات زخمی ہوئیں، جن میں سے 71 کو ابتدائی طبی امداد کے بعد اسپتال سے فارغ کر دیا گیا ہے۔
ٹی وی فوٹیج میں اسکول کی عمارت کی جلی ہوئی دیواریں، ٹوٹی کھڑکیاں اور دھوئیں کے آثار دیکھے جا سکتے ہیں، جبکہ والدین اپنے بچوں کی اطلاع کے لیے اسکول کے باہر جمع رہے۔
حکام کے مطابق کینیا کے تعلیمی اداروں میں آگ لگنے کے واقعات نسبتاً عام ہیں، اور صرف 2024 میں 100 سے زائد ایسے واقعات رپورٹ ہوئے۔ ماہرین کے مطابق ان میں سے کئی واقعات طلبہ کے احتجاج اور ناقص سہولیات کے خلاف ردعمل کے طور پر سامنے آتے ہیں۔
یاد رہے کہ گزشتہ برس بھی نیری کاؤنٹی کے ایک اسکول میں آگ لگنے سے 21 طلبہ جاں بحق ہوئے تھے، جبکہ 2001 میں نیروبی کے قریب ایک اسکول آتشزدگی میں 67 بچے ہلاک ہوئے تھے۔
حکام نے واضح کیا ہے کہ تازہ واقعے کی تحقیقات مکمل ہونے کے بعد ہی اصل وجوہات سامنے آئیں گی۔
