چترال اپر نے انتہائی دلچسپ اور سنسنی خیز مقابلے کے بعد چترال لوئر کو شکست دے کر کمانڈر پشاور کور جونیئر پولو کپ 2026 کا ٹائٹل اپنے نام کر لیا۔
چترال میں منعقد ہونے والے فائنل میچ میں دونوں ٹیموں نے شاندار کھیل کا مظاہرہ کیا اور میدان میں موجود شائقین کو بھرپور تفریح فراہم کی۔ روایتی پولو کے اس اہم مقابلے کو دیکھنے کے لیے چترال اور دیگر علاقوں سے بڑی تعداد میں تماشائی اسٹیڈیم پہنچے، جنہوں نے دونوں ٹیموں کے کھلاڑیوں کی بھرپور حوصلہ افزائی کی۔
میچ کے دوران کھلاڑیوں نے بہترین مہارت اور پیشہ ورانہ صلاحیتوں کا مظاہرہ کیا، تاہم چترال اپر کی ٹیم فیصلہ کن لمحات میں بہتر کارکردگی دکھانے میں کامیاب رہی اور ٹرافی اپنے نام کر لی۔
فائنل میچ میں نمایاں کارکردگی کا مظاہرہ کرنے پر عبداللہ رضا کو “مین آف دی میچ” قرار دیا گیا۔ ان کی شاندار کھیل نے ٹیم کی کامیابی میں اہم کردار ادا کیا۔
میچ کے اختتام پر منعقدہ تقریب میں کور کمانڈر پشاور نے بطور مہمان خصوصی شرکت کی اور فاتح و رنر اپ ٹیموں کے کھلاڑیوں میں انعامات اور ٹرافیاں تقسیم کیں۔
اس موقع پر اعلیٰ سول و عسکری حکام سمیت عوام کی بڑی تعداد بھی موجود تھی۔ تقریب کے شرکاء نے چترال میں امن، کھیلوں کے فروغ اور نوجوانوں کی مثبت سرگرمیوں کو سراہا۔
کمانڈر پشاور کور جونیئر پولو کپ 2026 کے کامیاب انعقاد پر چترال کے عوام نے پاک فوج، ایف سی خیبر پختونخوا نارتھ اور ضلعی انتظامیہ کا شکریہ ادا کیا۔ مقامی افراد کا کہنا تھا کہ ایسے کھیلوں کے مقابلے نوجوانوں کو مثبت سرگرمیوں کی طرف راغب کرنے اور علاقے میں سیاحت و ثقافتی سرگرمیوں کے فروغ میں اہم کردار ادا کرتے ہیں۔
