گلگت بلتستان میں حکومت سازی کے لیے پاکستان پیپلز پارٹی نے سیاسی رابطے تیز کر دیے ہیں جبکہ آزاد امیدوار حکومت سازی کے عمل میں کلیدی حیثیت اختیار کر گئے ہیں۔
ذرائع کے مطابق صوبائی صدر امجد حسین ایڈووکیٹ کی قیادت میں پارٹی کی اہم مشاورت جاری ہے۔ ڈویژنل صدر بشارت ظہیر اور الیکشن سیل کے کوآرڈینیٹر وزیر وقار بھی آزاد امیدواروں سے رابطوں میں سرگرم ہیں۔
پیپلز پارٹی کی جانب سے آزاد امیدوار محمد انور اور اسد شفیق سے بھی رابطے کیے گئے ہیں تاکہ حکومت سازی کے لیے مطلوبہ حمایت حاصل کی جا سکے۔
ذرائع کا کہنا ہے کہ پیپلز پارٹی صرف آزاد امیدواروں ہی نہیں بلکہ چھوٹی سیاسی جماعتوں کو بھی اپنے ساتھ ملانے کے لیے متحرک ہے۔ دوسری جانب پیپلز پارٹی اور مسلم لیگ (ن) کے درمیان مخلوط حکومت کے قیام پر بھی مشاورت جاری ہے۔
ذرائع کے مطابق ممکنہ پاور شیئرنگ فارمولے کے تحت وزیراعلیٰ کا منصب پیپلز پارٹی جبکہ گورنر کا عہدہ مسلم لیگ (ن) کو دیے جانے پر غور کیا جا رہا ہے۔
ادھر اسکردو اور دیامر کے بعض پولنگ اسٹیشنز پر 15 جون کو ری پولنگ ہوگی، جس کے بعد گلگت بلتستان کی حتمی سیاسی پوزیشن مزید واضح ہونے کا امکان ہے۔
